Basag na Holen

Lumagapak – pahaginit
sa bintana-
gumulong ang basag na holen
sa bumbunan ng gunita.

Dagling sulyap
sa salamin
ng antigong tokador– Wala!
Salamat
walang galos ni gatla.

Dinig sa likuran –
sa pumipintig na batok –
ang sentido ng kamusmusan.
Pitik sa goma ng tirador
ng mga batang sinisipat
bawat sanga. Paraiso
sa kanila ang malawak na tumana.

Masarap maging bata–
masarap

Manatiling bata.