Ikaw na ngayo’y nasa pinakamataas na luklukan
ng aming bayan: luwalhati — liwanag —
ang ibinabandila ng iyong pangalan.
Ngunit anong luwalhati ang mababanaag
sa isang magnanakaw na sa araw,
hindi man lamang sa gabi, nagnanakaw?
At anong luwalhati ang mababanaag
sa isang mamamatay-taong ang mga kamay
ay hindi matuyuan ng dugo ng bayan?
Luwalhati ang ibinabandila ng iyong pangalan,
ngunit isang silahis man lamang ng liwanag
ay wala ka —
at kahit na ningning ay wala sa iyo.
