sa ibabaw ng tulay
doon sila naghihintay
nagkukubli sa kalaliman ng gabi
nagtatago sa pagsulyap ng buwan
ilang ulit ko na silang nadaanan
nang-aakit ng mga hayok sa laman
upang pagdaka’y malagyan ng laman
ang kumakalam nilang tiyan
mahaba ang gabi
para sa mga mariang
naghihintay ng grasya
habang nagkukubli
sa kalaliman ng gabi.
aba ginoong maria
(na nasa malakanyang)
napupuno ka ng grasya
(mula sa kaban ng bayan)
nawa’y bigyan mo ng pansin
ang iba pang abang maria
(magbahagi ka naman
masyado kang buwaya)
na matagal nang naghihintay
ng pangako mong kaunlaran…
