Ang State Visit ni Pangulong Arroyo
Bilang Ebidensya ng Pagpapakatuta sa Amerika
Ni Danilo A. Arao

Napapanahong pag-aralan ang konteksto at manipestasyon ng kahirapan sa ating bansa para lubusang maunawaan ang pangangailangang isulong ang Rebolusyon ni Bonifacio.

Noong Nobyembre 28 lang ay ginunita ng CONTEND at Alliance of Concerned Teachers (ACT) ang ika-100 taon ng Republic Act No. 74 na ipinasa ng Taft Commission noong Enero 21, 1901. Ito ang nagtatag ng sistemang pang-edukasyon sa ating bansa na kolonyal ang oryentasyon. Ang mga Thomasites ang nagsilbing guro ng mga Pilipino noon na nagresulta lamang sa pagkalason ng isipan.

Noon, ang isyu ay paghahari ng Amerika at ang epekto nito sa mamamayan. Ganito pa rin ang sitwasyon hanggang ngayon.

Sa unang tingin, ang pagbisita ni Pangulong Gloria Macapagal-Arroyo sa Amerika noong Nobyembre 14 hanggang 23 ay isang simpleng junket lamang na dinaluhan ng mahigit 100 opisyal ng gobyerno at kapamilya ng pangulo. Pero kung pag-aaralan ang mga datos at sirkumstansya ng pagbisita, makikita natin ang ebidensya ng pagpapakatuta ng kasalukuyang administrasyon sa Amerika.

Mismong si Pangulong Arroyo ay nagsabing may stratehikong kahalagahan (“strategic importance”) ang suporta ng US sa ating bansa. Ayon sa kanya, sa loob ng maraming dekada, mananatili pa rin daw ang Amerika bilang nag-iisang pinakamakapangyarihang bansa sa buong mundo (“for many decades to come, America will still be the only superpower in the world”). [1]

Sa madaling salita, gusto ng kasalukuyang administrasyon na ikintal sa isipan ng mamamayan na tayo ay kailangang magpaalipin sa Amerika at magpatali sa kagustuhan niya. Sa mata ng administrasyon, ang kabutihang loob ng Amerika sa pamumuno ni Pangulong George W. Bush ay susi sa ating pag-unlad.

Hindi tuloy nakakagulat na ipinagyabang ng administrasyon ang pagkakakuha ng suportang militar na nagkakahalaga ng $100 milyon sa susunod na 12 buwan, suportang pang-ekonomya na nagkakahalaga ng $4.6 bilyon, at kondisyonal na “debt relief” na nagkakahalaga ng $430 milyon.

Ang sinasabing tagumpay ng pagbisita ni Pangulong Arroyo sa Amerika ay para lamang sa militar dahil lalo lamang lumobo ang pondo nito. Matatandaang sa panukalang pambansang badyet para sa 2002, umabot ng 41% ang ilalaki sa badyet sa depensa kumpara sa nakaraang taon. (Tingnan ang Talahanayan 1)

Ikalawang pahina