Pondo at Pangako
Ni Rodelio

“NASA BUKID ang nakararaming maralita, kaya pagyayamanin natin ang pagsasaka at pangingisda….”

Ito ay bahagi ng pahayag ng pangulo sa kanyang State of the Nation Address o SONA. Wari'y puno ng katotohanan at pakiki-simpatiya sa mga maralita at kapos-palad nating mga magsasaka ang kanyang pahayag.

Makatuwiran lang naman ang ganitong pahayag. Isa sa mga pangunahing pangagailangan ng tao ay ang pagkain kaya dapat lamang na unahin natin ang pangagailangan ukol dito. Sa kasalukuyan ay maraming Pilipino ang sumasala na sa oras ng pagkain. Karamihan sa atin ay dalawang beses na lamang kumakain, ang iba ay isa, at kung magkaminsan ay hindi pa.

Panahon na para seryosohin ng ating pamahalaan ang programa ukol sa agrikultura. Sa kabila ng krisis pang-ekonomiya, kinakailangan nating maging self-sufficient at hindi umaasa sa pag-angkat lamang. Sa kasalukuyan ay mataas pa rin ang porsyento ng pag-angkat natin ng bigas. Karamihan dito ay sa bansang Thailand, samantalang naiiwang nakatiwangwang ang ilang lupain sa ating bansa dahil sa kaulangan sa inprastraktura.

Ngunit ang tanong ng karamihan sa ating mga kababayan ay kung kaya bang tuparin ng ating Pangulo ang kanyang mga pahayag? Sabi pa ng ating Pangulo, “There is money and there will be money…” Tinutukoy niya ang budget para sa agrikultura. Ngunit ano ba talaga ang sinasabi nyang badyet para sa agrikultura? Ito ba ay ang anim na bilyong pisong laan para sa naturang sector?

Nakalulungkot isipin na umaabot sa 57.3 bilyong piso ang nakalaan para sa pambansang seguridad samantalang ang halagang nakalaan para sa pagsasaka ay anim na bilyon lamang.

Kung talagang seryoso ang ating pangulo sa kanyang mga pangako na maiangat ang kabuhayan ng mga pilipino, kailangan sigurong masusing pag-aaralan at suriing mabuti ang pondo para sa ating bayan.

Nakalulungkot isipin pero lumalabas na mas pinapaboran ng ating pamahalaan ang pagbili ng mga armas pandigma kesa sa kumakalam na sikmura ng mga maralita.