ANG MGA dorobong higanteng cellphone companies nga naman, oo.

Ang Globe at Smart kasama na ang kanilang mga affiliates ay nagsasabi sa ating mga taga-Generation Txt na "there is no such thing as a free lunch", sabay hirit pa na kesyo nalulugi sila kaya kailangan nilang magbawas ng free text messages allocation.

Hindi ko lubusang maisip kung bakit kinakailangan nilang ipasa ang kanilang pagkalugi kuno sa ating mga subscriber. Sa isang banda, para bang isang makabagong uri ng highway robbery o holdap ito sa panig nating mga gumagamit ng cellphone, lalo na sa mga tinuturing na text adik tulad ko. Para bang unti-unti na tayong pinahihirapan ng mga dambuhalang kumpanyang ito at itinaon pa nila sa kung kelan pa talagang pahirap nang pahirap ang buhay ng Pilipino ngayon.

Ang pinagtatakhan ko, bakit ngayon pa nila ito gagawin? Hindi na kaila sa ating mga text adik na napakapangit na nga ang serbisyong binibigay ng mga kumpanyang ito, tapos lalo pa nilang pag-iibayuhin ang mga kapalpakang ito sa pamamagitan ng panibago na naman nilang gimik -- ang free text reduction scheme --kung saan, sabi nila ay kinakailangang bawasan ang mga free text hindi lamang dahil sa nalulugi sila, kundi upang makapagsagawa sila ng network upgrades para daw makaya ang dumarami nilang mga subscriber.

Ni wala man lang ngang apat na linggo mula nang una nilang i-anunsiyo na magbabawas sila ng free text at tila baga atat na atat na silang kumita ng limpak-limpak sa gitna ng kanilang palpak na serbisyo at ang walang patumanggang palusot na naiisip ng kanilang mga spin doctors. Tila baga natapakan na rin ang kanilang madalas na sinasabi sa kanilang pagpapabango sa publiko na "Customer is always first in our minds". Tuloy, tuwing naiisip ko ang mga katagang iyan, para bang lumalabas na sa ginagawa nilang ito, niloloko na nila tayo at ang tangi na lamang nilang iniisip ay ang magpayaman! Eh bakit nila ito binulgar lang sa publiko kung kelan palapit na ang buwan ng Setyembre, kung kelan una nilang ipatutupad ang iskemang iyan.

Sa unang tingin, totoo ba na nalulugi sila? Sa kanilang mga financial statements na nailahad sa publiko, halatang hindi naman sila nalulugi o palugi. Halimbawa na lang ang Globe, na umaabot ang kanilang kita sa P15.4 bilyon sa taong ito lamang samantalang ang Smart ay P12.3 bilyon naman. Iyan ba ang matatawag na nalulugi - kahit ano pang palusot na gawin nila, ke nalulugi sila dahil sa pagbagsak ng piso, ay lumalabas ang katotohanan na kumikita pa rin sila ng limpak-limpak, salamat sa kanilang palpak na serbisyo.

Ang isa pang bagay na naglalaro sa aking isipan ukol dito sa usaping ito ay ang kawalang-aksyon ng National Telecommunications Commission (NTC), ang ahensiya ng pamahalaan na nagre-regulate sa mga kumpanya ng telekomunikasyon, lalo na kung ang pag-uusapan ay ang mga singilin ng mga ito sa kanilang mga serbisyo tulad ng rates sa pagtawag kada minuto. Itinuturing lang ng NTC ang short messaging service o text messaging bilang isang "value-added service". Sa madaling salita ay walang direktang pakialam ang ahensiyang ito sa pag-regulate sa singilin nito. Kumbaga, binibigyan pa nga nito ng laya ang mga higanteng kumpanyang ito na magtakda ng singilin sa pagte-text, gaano man ito kamahal, nang hindi na kinakailangang isumite pa sa NTC para pagdesisyunan, di tulad ng sa rates para sa voice calls..

Tuloy, lumalabas na kasabwat pa ang NTC sa mga higanteng kumpanyang ito sa kanilang panlalamang at panglilinlang sa mga subscriber. Paano kasi, kung yaong mga reklamo pa nga lang ng mga subscriber ay hindi na nga nila matugunan, ito pa kayang walang patumanggang pag-alma ng Generation Txt ay di pa kayang gawan ng paraan ng NTC! Para pala silang kartel na nagsasabwat-sabwatan para lokohin tayo na tulad ng ginagawa ng mga dorobo.

Hindi ko na sukat-akalain na ganito na pala ang lebel ng pagiging gahaman ng mga kumpanyang ito at ang kanilang pagnanais na pagkakitaan ang sambayanan. Nahahalata na ang kanilang motibo sa kanilang mga ginagawa. Ano ba talaga ang gusto nilang mangyari?

Tama nga ang sinabi ng isa kong kaibigan, na mas mabuti pa ang buhay na walang cellphone para walang reklamo laban sa mga dorobong kumpanyang ito. Kaso dalawang taon na akong gumagamit nito, kaya tulad nga ng droga ay mahirap na sa akin ang buhay sakaling wala akong cellphone. Tulad ng milyon-milyong kababayan ko, naging bahagi na rin ng buhay ko ang pagte-text, at kahit papaano ay may pakinabang din naman. At ang pakinabang na ito ay nais pang kitlin ng mga dorobong nagpopostura na naglilingkod kuno sa sambayanan.

Sadyang napakaraming dahilan kung bakit tayo dapat magprotesta sa mga panlilinlang na ito ng Globe at Smart hanggat hindi sila nagigising sa katotohanan na kinukupit na nila ang bulsa ni Juan dela Cruz sa pamamagitan ng mga iskemang iyan. Hindi pa dapat magwakas ang laban nating mga texters sa isang araw lamang na hindi pagte-text o paggamit ng cellphone sa pagtawag. Dapat ay tuwiran na nating turuan ng leksyon ang mga ito upang magising sila sa mga responsibilidad nila sa ating mga subscribers at nang kahit papaano ay hindi tayo ma-holdap ng mga ito sa di inaasahang pagkakataon. (Tinig.com)