SPECIAL REPORT
Bagong baho sa likod ng uniporme
ni Rey Refran
Ikatlong pahina

balik sa ikalawang pahina

SIN: Berdugo sa kampus, gaya ng UP Manila
Pinakamalaking baho ng sistema ng ROTC ang umano'y pagtatayo ng Student Intelligence Network (SIN)

Walang itong ipinag-iba sa Barangay Intelligence Network (BIN) na isang mekanismo ng mapanupil na Oplan Makabayan ng militar sa kanayunan. Itinayo umano noong nakaraang semestre kasabay ng pagputok ng isyu ukol sa korapsyon sa loob ng ROTC, binubuo ito ng mga kadete ng ROTC at pinamumunuan ng mga opisyales sa bawat balangay, at nilalayon nito ang pagbabantay sa mga samahang progresibo sa loob ng unibersidad na yumayakap sa ideyolohiya ng pambansang demokrasya (national democracy), mga kapatiran (fraternity) at maging sa mga institusyong pampaaralan tulad ng Sangguniang Mag-aaral at mga pahayagang pang-kampus.

Kumukuha ang mga miyembro nito ng bawat butil ng impormasyon patungkol sa mga kilos ng mga samahang ito at agad na inuulat ito sa mga kadete-opisyales at maging sa mga nakatataas sa loob ng punong himpilan ng Philippine Army sa Fort Bonifacio. Kung minsan ay nagsisilbi rin silang utusan ng mga opisyales, na kung minsan ay tila baga nagmumukha silang tsimoy, ngunit para sa kanila ay wala silang magagawa dahil kinakailangan nila iyan upang makapasa man lang sa kursong ROTC.

Sa panayam ng Tinig.com kay Carl Ramota, manunulat ng Manila Collegian, pinatotohanan niya ang pagkakaroon ng ganitong yunit sa loob ng UP Manila. (Bukod sa UP Manila, nagtayo din ng SIN ang UST at PUP na kung saan umaabot sa mahigit sandaan ang mga miyembro nito.) Ang pag-iral nito sa UP Manila ay nakuha ng pahayagan batay sa isang taped interview sa ilang mga kadete ng ROTC na nakaka-alam sa mga kilos ng naturang SIN.

Ayon kay Ramota, ang mga pangkaraniwang nire-rekrut sa unit na ito, na mas lalong kilala sa tawag na "Sentinels", ay mga tapos na sa unang dalawang taon ng kursong ROTC o mga nasa ikatlo o ika-apat na taon ng kolehiyo; mga bumabagsak sa ROTC na nagnanais bumawi upang maka-gradweyt; at maging ang mga kasapi ng mga progresibong samahan. Ginagawa ito ng mga kadete-opisyales kapalit ng mga insentibo tulad ng eksempsyon sa pangkaraniwang training sa ROTC at insentibong pera.

Ngunit ang pagpasok ng sinuman sa unit na ito, na itinayo sa UP Manila, noong ikalawang semestre ng taong 2000-2001, hindi rin ito nangahulugan na ligtas ito sa mga bayarin dahil ang SIN ay nagbibigay-daan din sa katiwalian. Bawat recruit nito ay kinakailangang magbayad ng di lalagpas sa P3,000 sa kabuuan ng pagiging miyembro nito, sa sari-saring dahilan.

Bukod sa pagkakaroon ng malakihang bayarin sa loob ng "Sentinel" ay hindi rin sigurado ang mga miyembro nito sa kaligtasan sa kanilang buhay. Hindi lamang ang paggagawad ng mga bagsak na marka ang kanila sa oras na pumalpak sila sa kanilang tungkulin, nahaharap rin sa peligro ang kanilang buhay. Ito ay walang pinag-iba sa mga civilan agents ng pulis at militar na kapag wala na silang silbi sa samahan ay pinapatay o kinakasuhan ng katakut-takot.

Hindi na rin kataka-taka ang pagkakaroon ng mga exemption sa kurso basta lamang magbabayad sila ng halagang umaabot sa P13,000. Kahit ang mga absences sa isang training day ay pwede nang daanin sa pamamagitan ng pera o alak sa ibang unibersidad.

Sa artikulo na lumabas base sa naturang taped interview, detalyadong ipinaliwanag ang mga taktika ng mga kadete-opisyales ukol sa pagtatayo ng "Sentinels" sa UP Manila. Isa sa mga dahilang pinapakita dito ay ang naka-ambang panganib na pasukin ang kampus ng New People's Army (NPA) sa pamamagitan ng mga aktibistang organisasyon sa kampus, kaya nila ito pinatitiktikan ang bawat kilos ng mga ito.

Lalo pa itong napatunayan sa karanasan ng UP Manila. Ani Ramota, base sa mga impormasyong nakalap ng "Sentinels" ay nagawa ng balangay na pahiyain ang mga miyembro ng mga organisasyong ito at campus press tulad ng nangyari kay Panemanglor. Naging paboritong pet peeve din ng mga kadete-opisyales ang pagdidiin sa mga kadeteng nakikisimpatiya sa mga tinuturing nilang "maka-Kaliwang samahan" at ang paghalungkat ng bawat detalye ng buhay-mag-aaral ng sinumang pinaghihinalaan, mula sa mga paborito nito sa buhay hanggang sa pilosopiya. Dito, kapag hindi tumugma ang sagot ng pinaghihinalaan sa impormasyong nakalap ng naturang SIN ay babansagan pang "sinungaling."

huling pahina