SPECIAL REPORT
Bagong baho sa likod ng uniporme
ni Rey Refran
Ikalawang pahina

balik sa unang pahina

Hindi pwede!
Ngunit para sa grupong Abolish!, isang multi-sektoral na grupo na binubuo ng mga militanteng kabataan at lider-estudyante, hindi ito katanggap-tanggap sa kanila kung kaya't marapat pa ring igiit ang walang kundisyong abolisyon ng kursong ROTC mula sa kurikulum.

Ayon kay Rey Asis, convenor ng Abolish! at pambansang pangulo ng College Editors Guild of the Philippines, isa sa mga grupong bumubuo nito, wala nang dapat asahang bago sa Optional ROTC Program dahil napananatili lamang nito ang oryentasyong pang-militar at pagiging sapilitang rekisito bago makapagtapos ng kolehiyo ang isang lalaking mag-aaral.

"Sa pagpapanatili ng karakter nitong pang-militar at mala-mersenaryong tradisyon ng AFP, lalo lamang mapalalago ang kultura ng karahasan sa mga mag-aaral", ang nasasaad sa isang kalatas mula sa samahan.

Ihinalintulad ni Asis ang bagong iskemang ito sa isang lumang tugtugin. Binatikos rin nito ang selective implementation ng bagong programang ito na sa simula ay sasaklaw lamang sa kabuuang 30% ng mga pribadong unibersidad at kolehiyo na nagpapatupad ng Expanded ROTC.

"Ang masaklap pa nito, hindi kasama ang mga kadete mula sa mga State Colleges and Universities (SCU's) tulad ng PUP at UP", wika pa ni Asis.
Nagkakaisa ring idinugtong nina Asis at Apolinario Alvarez, pangkalahatang-kalihim ng Anakbayan, na ang patuloy na pamamayagpag ng ROTC sa pamamagitan ng pagsasa-optional nito ay isang sampal sa tunay na diwa ng boluntarismo at pagmamahal sa kapwa na siya sanang diwa ng ROTC mula pa noong una itong ipatupad.

"Sa halip na ituro ang mga kabutihang-asal tulad ng pagmamahal sa bayan at disiplina, binabaliktad lalo ng ROTC at mga nagpapatakbo nito ang depinisyon ng mga diwang ito sa pamamagitan ng pag-iibayo ng imahe ng macho-pasismo na kung saan lalamangan mo ang iyong kapwa, kung kaya't walang kundisyon namin itong hinihiling na buwagin kahit may ipapalit pang programa ang militar sa ilalim nila", dagdag pang pahayag ni Alvarez.

Mga panibagong baho
Bukod sa mga nauna at dokumentado nang naibulatlat na baho ng ROTC tulad ng ginawang expose nina Chua at Romulo Yumul, isang dating kadete-opisyal ng UST-ROTC at ngayon ay tumatayong tagapagsalita ng Abolish! at lumabas sa The Varsitarian, ang pahayagang pang-mag-aaral ng UST, inilantad rin ng samahan ang mga panibagong baho na lalong magbibigay ng lakas ng loob sa kanila upang patuloy na igiit ang pagbuwag ng ROTC.

Isa na rito ay ang pananakot at paniniktik umano ng mga opisyales ng ROTC sa mga pahayagang pang-kampus na sumusuporta sa panawagang ito. Ayon kay Asis, may mga ilang kaso na nito na natatanggap ang kanilang tanggapan sa CEGP. Isa na rito ay ang napaulat na ginawang pagsalakay ng mga kadete-opisyales sa tanggapan ng pahayagang The Outcrop ng UP Baguio at ang panununog ng mga sipi nito. Wala ring ligtas dito ang The Manila Collegian ng UP Maynila at The Catalyst ng Polytechnic University of the Philippines.

Nakararanas din daw ng iba't-ibang uri ng pananakot ang mga kawani ng mga pahayagang nabanggit, kabilang na ang paniniktik sa mga linya ng telepono ng kani-kanilang mga tanggapan at maging sa mga cellular phones ng mga bumubuo ng patnugutan na diumano'y kagagawan ng mga taga-Student Intelligence Network (SIN) ng kani-kanilang mga paaralan.

Nagiging katatawanan at kahihiyan din sa bawat training day ang mga kasapi ng mga pahayagang bumabatikos sa ROTC. Sa UP Manila na lang ay isa si Ajeet Panemanglor, kawani ng Manila Collegian, sa mga nakaranas ng pagpapahiya ng mga kadete-opisyal sa harap ng buong yunit ng ROTC dahil lamang sa siya ay manunulat sa pahayagang unang nagsiwalat ng pagkakaroon ng SIN sa mga unibersidad sa Kalakhang Maynila.

Ayon kay Asis, ang mga gawaing ito sa mga pahayagang pang-mag-aaral at mga kawani nito ay tuwirang paglabag sa karapatan ng malayang pamamahayag, pagpapahayag ng pansariling saloobin at karapatang makapagtipon na itinatadhana ng Saligang-Batas. Maging ang gawaing ito ay banta rin sa pagiging conducive learning environment ng mga unibersidad na ito.

ikatlong pahina