SPECIAL REPORT
Bagong baho sa likod ng uniporme
ni Rey Refran

SIMULA nang ilantad sa publiko ni Mark Welson Chua, ang pinaslang na kadete-opisyal at mag-aaral sa Unibersidad ng Sto. Tomas, ang mga kabulukan na kaakibat ng kursong Reserve Officers Training Corps (ROTC) ay halos hindi na mapigil ang pag-alingasaw ng mga baho ng programang ito.

Lalong nagpatindi sa panawagang tuluyan nang alisin ang ROTC, na sapilitang ipinakukuha sa mga kalalakihang nag-aaral sa kolehiyo, ang brutal na pagpatay kay Chua noong nakaraang Marso makalipas ang kanyang expose na nagsasangkot sa katiwalian sa mga matataas na opisyales ng balangay ng ROTC sa UST.

Mula sa isang simpleng manipesto na nilagdaan ng mga administrador ng iba't-ibang paaralan sa University Belt na naglalayong buwagin na ang ROTC ay lumawak ang panawagang ito. Nakaabot na ang panawagan sa hanay ng mga progresibong kabataan at maging mga pangkaraniwang mag-aaral mismo na walang nakikitang kabuluhan sa kanilang pagkuha ng kursong ito.

Habang isa-isang lumalabas ang mga kabalintunaan, na sapat nang dahilan upang buwagin ang ROTC, nitong buwan ng Agosto ay inanunsiyo ng mga awtoridad pang-edukasyon ang pagsasa-optional ng ROTC sa mga mag-aaral simula sa buwan ng Nobyembre.

Ngunit sa halip na tanggapin ito ng mga mag-aaral ay binatikos pa nga ito. Anila, pagpapanatili lamang ng isang bulok na karakter na macho-pasista ang hakbang na ito na taliwas sa diwa ng boluntarismo dahil sa ang mga ahente pa rin ng militar ang hahawak sa programang ito. Manapa, sa ganoon ding panahon ay ibinunyag na naman ang dalawang baho na nagpapatunay sa pasistang karakter ng kursong ROTC, na silang mas mabigat na dahilan upang patuloy na ipagpanawagan ang pagbuwag nito.

Optional ROTC
Simula sa buwan ng Nobyembre 2001, ikalawang semestre ng taong akademiko 2001-2002 ay ipatutupad na ang optional na pagkuha ng kursong ROTC sa mga mag-aaral. Ang balangkas ng bagong programang ito ay pinagtulung-tulungan ng Depatrment of National Defense, Department of the Interior and Local Government, Armed Forces of the Philippines, at ng Commission on Higher Education. Dito, mananatiling ang DND at AFP pa rin ang punong-abala.

Sa unang tingin, mas pagpapalawak lamang ito ng Expanded ROTC Program na mula pa noong 1996 ay ipinatutupad sa mga unibersidad. Sa ilalim ng Expanded ROTC, maaaring pumili mula sa Milirary Training Service, Law Enforcement Service (LES) at Civic Welfare Service (CWS) ang kadateng nasa ikalawang taon na ng ROTC.

Kabilang sa mga komponent na bubuo sa di-sapilitang ROTC ay ang pangkaraniwang ROTC Training Module na kahalintulad sa isinasagawa sa ngayon tulad ng basic military drills and exercises, ang LES Training, na naglalayong makatulong sa pagpapanatili ng kaayusan at katahimikan sa pamamagitan ng pagtulong sa gawaing-pulis at pagtratrapik; at ang CWS na naglalayong maka-agapay sa mga proyektong pang-sibiko tulad ng paglilinis ng mga kanal at daluyan ng tubig at pagpapanatili ng kalinisan ng kapaligiran.

Ngunit di tulad ng kasalukuyang ROTC na limitado lamang sa kalalakihan, pati ang mga kababaihang mag-aaral sa kolehiyo ay oobligahin na rin sa Optional ROTC. Ngunit pangunahin pa rin nitong layunin ay ang makisangkot ang mga kabataan sa diwa ng pagmamahal at paglilingkod sa bayan, na siya ring diwang "gumagabay" sa kasalukuyang ROTC bago ito dagukan ng mga eskandalo.

ikalawang pahina