MARAMING NANGYARI mula sa paglabas ng Tinig.com v39 hanggang sa
isyung ito.
Sinaklaw ng nasabing panahon ang pagkakaligtas sa buhay ni Angelo
de la Cruz sa pamamagitan ng pagpapauwi sa mga tropang Pilipinong
nasa Iraq.
Nasakop din nito ang pang-iinsulto ni John Howard, punong ministro
ng pamahalaan ng Australya, sa kilusang kontra-digmaan sa Pilipinas
na ang malalaking kilos-protesta ay nagtulak sa gobyernong pauwiin
ang mga sundalo nitong nasa Iraq. Sa isyung ito ay may sagot sa
kanya ang Filipino Youth for Peace. Nauna nang ilabas ng ilang pahayagan
sa Internet, tulad ng journal Online at ABS-CBNNews.com, ang pahayag
na ito.
Sa panahong tinutukoy ay nangyari din ang isang pag-uusap hinggil
sa World Trade Organization sa Geneva, Switzerland. Doo'y nabuo
ang isang package ng mga patakarang ayon kay Edwin Licaros ng QC
Indymedia ay hindi tumutugon sa mga pangangailangan ng mahihirap
na bansa.
Naganap din ang isang serye ng mga kagimbal-gimbal na pagpatay
sa mga mamamahayag sa mga lalawigan.
Inabot din ang isyung ito ng paglulunsad ng Antonio Zumel Foundation,
na naglalayong bumuo ng isang emergency relief fund para sa mga
retiradong mamamahayag na hindi nagbili kailanman ng kanilang integridad.
Kasama sa mga paunang aktibidad ng foundation na ito ang paglulunsad
ng isang librong katipunan ng mga artikulo ni Antonio Zumel, dating
pangulo ng National Democratic Front (NDF) at isang mahusay at dakilang
mamamahayag sa tradisyon nina Marcelo del Pilar at Amado V. Hernandez.
Ginamit ng Tinig.com ang rebyu ng libro, na sinulat ni Bobby Tuazon
sa Bulatlat.
Nariyan din ang panukala ng Armed Forces of the Philippines na
magpaloob ng mga sundalo sa mga organisasyon ng media upang magsilbing
mga tagaulat hinggil sa armadong labanan sa kanayunan. Mahigpit
itong tinutulan ng National Union of Journalists of the Philippines
sa isang pahayag sa isyung ito.
Nananatiling maiinit na isyu, samantala, ang pakikialam ng Estados
Unidos sa usapang pangkapayapaan sa pagitan ng gobyerno ng Pilipinas
at NDF, at ang pagtatalo hinggil sa two-child policy ni Kin. Edcel
Lagman. Minabuti na ng Tinig.com na lumahok din sa mga usaping ito
sa pagitan ng paglalabas ng mga pahayag at artikulong may kinalaman
dito.
Mula naman sa paglabas ng isyung ito hanggang sa v41, kabilang
sa malalaking mangyayari ay ang paglulunsad sa Pilipinas ng librong
Jose Maria Sison: At Home in the World - Portrait of a Revolutionary
(Conversations with Ninotchka Rosca), na nirebyu na ng inyong lingkod
sa Bulatlat. Ang naturang rebyu ay ginamit din sa isyung ito ng
Tinig.com.
Nariyan pa rin siyempre ang di-dapat na mawalang tula, maikling
kuwento, at personal na komentaryo hinggil sa iba't ibang aspeto
ng buhay-kabataan.
Sana'y maibigan ninyo ang Tinig.com v40!
