NATATANDAAN KO ng nag-aaral pa ako sa mataas na paaralan, kailangan
bawat kilos namin ay naaayon sa kagustuhan ng aming mga guro, takot
man kami sa kanila ay napakataas naman ng aming respeto sa kanila.Marahil
ito ay sa kadahilanang mataas ang kinalalagyan nila sa ating lipunan.
Ang aming mga guro ay pinili mula sa mahuhusay na tao at sinanay upang
humubog ng talino at kaalaman ng kabataan. Nuong nasa kolehiyo ako,
sa Pamantasang Normal ng Pilipinas, natuto ako kung paano maging isang
marangal na guro, sinanay ako sa dapat na maging gawi ng isang tunay
na guro. Pati nga pagsulat sa pisara at pagbibigay ng papuri at pagsasabi
ng maaring makasakit na salita sa aming magiging mag-aaral ay ipinunla
sa aming mga isipan.
Subalit ano na ba ang kalagayan ng ating edukasyon na nagsasanay
sa mga guro? Bakit tila yata kapag ang isang bata ay walang interes
sa pag aaral o medyo mahina ang utak ay pinapayuhang mag-teacher na
lamang? Ganito na ba kababaw ngayon ang pagtingin ng lipunan natin
sa isang dakilang bokasyon?
Sabi ng tatay ko noon, bakit daw ako magtititser eh wala naman daw
pera ang mga teacher? Pero sabi ko sa kanya, wala ngang pera pero
ang makita mong naging matagumpay ang isa sa iyong mga estudyante
ay higit pa sa pera ang halaga, makita mo lamang na napakinabangan
nya ang mga naituro mo sa kanya, para ka na ring tumama sa lotto ng
100 milyon.
Iba-iba ang pananaw ng tao sa yaman, merong sa pera sinusukat ang
yaman; ang iba naman, sa kalusugan; ang iba, sa mga naisulat o naipinta.
Ako, ang kayamanan ko ay makita ang mga batang naturuan ko na nagagamit
nila ang mga pagpapahalaga sa kanilang pang-araw-araw na buhay. Maging
mulat sila sa mga pang-aabuso at tumulong sa mga nangangailangan.
Isa rin siguro sa mga dahilan kung bakit naging mababa ang pagtingin
ng lipunan ng tao sa mga guro ay ang pagwawalang-bahala ng ating pamahalaan
sa kalagayan ng ating mga guro. Tuwing eleksiyon, maghapon-magdamag
ang mga guro sa kanilang trabaho, mistula silang mga alipin sa pagbibilang
ng boto, 'tapos, sasabihin ng mga talunang pulitiko na mandaraya daw
ang mga guro. Matagal nang tapos ang eleksiyon pero parang namamalimos
pa rin ang mga guro ng perang kanilang pinaghirapan.
Napakasakit tanggapin pero ang sahod ng isang karaniwang guro ngayon
ay nagalalagay sa kanya sa ilalim ng poverty line, ibig sabihin, ang
kita ng guro ay hindi sapat para siya ay mamuhay nang marangal. Kawawa
naman, humuhubog ng mamamayan subalit inaalipusta ng mga hinubog niya.
Siguro, si GMA ay galit sa kanyang mga guro, baka hindi siya makita
noon. Joke lang.
Sa mga estudyante ngayon na hinuhubog ng matiisin at mapagpalang kamay
ng isang guro, sana naman, please return the favor.
---------------
Si Antonio, 38, taga-Balanga, Bataan, ay isang instruktor sa kolehiyo.
