Si Sisa, ang Paborito Kong Senadora
ni Tembarom

NAPAKAGALING mag-Ingles ng paborito kong senadora. Hayop ang accent niya, pare! Matindi. Kapag narinig mo siya, mapapanganga ka sa paghanga. Masasabi mong palaban nga tayong mga Pinoy sa Inglesan. Kaso nga lang, minsa'y sumasablay rin si Aling Sisa Senadora-nabubulol siya. Kasi naman, punto niya'y Bisayang slang!

Sobrang talino rin nitong si Aling Sisa. Di lamang siya graduate ng Unibersidad ng Pilipinas, nakatuntong din siya ng Harvard, Oxford at kung anu-ano pang malalaki at pawang mga sikat na pamantasan sa dakong Kanluran. At para sa kanya, mga mabababang uri ng nilalang ang mga hindi nakapasa sa UP at ni hindi nakatutuntong sa mga stateside niyang escuela. Napakataas ng IQ niya. Balita ko nga'y member pa siya ng Mensa--yung samahan ng mga taong matataas ang IQ sa buong mundo. Sigurado ako, square root lang ng numero ng IQ niya ang kay dating panggulong Asyong Salonga!

At itong si Aling Sisa ay napakatapang. Hindi siya matatakot kailanman sa mga gwardya-sibil, pagkat ang kanilang mga bala ay pang-almusal lang niya. Bukod pa rito, may nakahanda siyang baril sa kanyang mesa.

Tagapagtanggol siya ng mga naapi, kaya naman halos tumuwad siya maisulong lamang ang laban ni Asyong, na ayon sa mga kaniya at ng mga kasama'y inaapi raw ng mga mayayama't makapangyarihan.

Sobrang bilib ako kay Aling Sisa. Ang galing-galing kasi niyang magpatawa. Minsa'y sinabi niyang magpapabaril siya sa Luneta kapag nanalo ang lahat ng 13 mortal na kalaban nila sa eleksyon. O, di ba kakaaliw siya, nais niyang gayahin si Jose Rizal? Minsan nama'y sinabi niyang tatalon siya sa eroplano nang walang parachute kapag naaresto si Asiong. Di lang pala siya high school declamation contestant, stuntwoman na rin siya.

Pero medyo sinungaling siya minsan. Di niya tinupad ang ikalawang sinabi niya. Ang excuse lang niya, "I lied! Bwahahahahahaaaahaha!"

Si Sisa ay mass leader rin pala; mala-Gabriela Silang ang aking bida. Bago salakayin ng mga kampon ni Asyong ang Palasyo nong Mayo 1, kasama si Sisa sa mga nagpa-agit sa palabang mob. Yun nga lang, noong nagkakagulo na raw sa Mendiola, wala na sa eksena si Sisa. Ang tsismis na kumalat, nagsu-swimming daw ang bruha!

Kakaiba di ba? Multi-talented talaga si Aling Sisa. Kaya naman lungkot na lungkot kaming mga nauto niya noong Mayo 14. Biruin mo, ang paborito naming senadora'y tila di na makababalik sa Senado. Samantalang noon, ingat na ingat ang mga tisoy at tisay na kakalat kalat at titingin-tingin kay Sisa sa Senate halls, hah! Bawal kasing titigan si Sisa--kadalasa'y naghuhuramentado siya!

Pero ngayong talunan na si Sisa, ang paghahanap kina Basilio't Crisipin ay malamang na itutuloy na lamang niya.

----------------------
Halata bang hindi na paborito ngayon ni Tembarom si Sisa?