DARATING SI Kuya sa bahay, mangangalisag ang balahibo ng alaga naming
pusa. Magtatago ito sa ilalim ng kama o kaya'y susuot sa kisame. Kahit
tanghali pa, hahapon na ang mga tandang at inahin sa tuktok ng puno
ng duhat. Makakalimot ang mga gansang kumembot sa pagsiksik sa damuhan,
matatameme ang mga kambing, at mamumutla ang mga baboy.
"Hala, sige magsitago kayo!" hahalakhak si Kuya nang nakapamewang
habang nanunukot sa kaba ang aming mga alaga.
Aalis si Kuya sa bahay, maluwalhating lalabas ang mga daga mula
sa kani-kanilang lungga, maghaharutan ang aso't pusa, muling mapupuno
ng siyap at tilaok ang aming bakuran at maglulundagan ang mga tilapya
sa pispan.
Ganoon lagi. Pag nariyan si Kuya, nauudlot sa pangingitlog ang mga
inahin sa silong namin. Nawawalan ng ganang kumain ang mga baboy.
Naglalaho ang tahol, ngiyaw at putak. Parang sementeryo ang aming
bakuran, tahimik na tahimik, saka dadagundong ang bawat hakbang ni
Kuya.
Libangan ni Kuyang ibitin ang aso nang nakakadena, banlian ang matatakaw
na pusa, putulan ng buntot ang mga butiki, bunutan ng binti ang mga
nahuhuling tutubi at pagbuhul-buhulin ang mga uod.
"Inililigtas ko lang naman ang buong mundo." Ikakatwiran
niya lagi.
"Wag ka ngang ganyan, Delfin," saway ni Nanay kay Kuya,
"mamaya magtampo ang ating mga alaga."
Hindi pa man natatapos magsalita si Nanay, may maririnig na namang
tarantang atungal ng nabigwasang kambing,
"Eto'ng sa,yo, ang bago kong laser sword."
"Muli na naman tayong iniligtas ng ating bida." At papalakpakan
ni Kuya ang kaniyang sarili.
Kami ni Nanay, magiging abala sa pagwawalis sa nagkalat na magang
pakpak at balahibo, sa paghilot sa mga pilay at pagpapapimpis ng mga
bukol.
Minsan, lupaypay na nahiga ang aso naming sa gilid ng pintuan. Dumating
si Kuya, pasipul-sipol. Marahang ipiningot ni Kuya sa tenga ng aso
ang sipit na kanyang nakuha mula sa sampayan. Napabalikwas ang aso,
pumungas-pungas ito at sinakmal ang binti ni Kuya.
Halos umaalulong na iwinasiwas ni Kuya ang kaniyang binti. Tumilapon
lampas sa bakod ang aso.
"Wag na wag kang magsusumbong," banta sa akin ni Kuya.
Nang makahanap ako ng alcohol at bawang ay nakaalis na si Kuya.
Nanamlay bigla ang aso namin. Ayaw nang kumain. Ikinulong ito ni
Tatay dahil binubulaan ng laway ang bibig, antalim ng tingin at nasasakal,
nagpupumiglas na makawala sa kadena. Dalawang gabi kaming di nakatulog
dahil di ito tumahan-tahan. Kinabukasan, naghukay kami ni Tatay sa
likod-bahay para doon ilibing ang aming alaga.
Isang araw, nakita namin si Kuya sa taas ng puno ng akasya, naglalaway,
sigaw nang sigaw habang pinupunit ang kaniyang t-shirt. At bigla siyang
lumipad.
