ISANG POPULAR na kataga ang maririnig mo sa mga Pilipino ay ang "Ako
ay Pilipino."
Sa totoo lang,hindi ko alam kung ano talaga ang ibig sabihin ng mga
kababayan ko kapag sinasabi nila ang mga katagang ito. Mayabang pa
nga tayo dahil ilang beses nang tiningala ang lahing Pilipino sa buong
mundo kung kasaysayan ang pag-uusapan. nakakatuwa sapagkat naalala
ko pa noong elementarya pa lang ako, palagi sinasabi ng titser ko
na "Taas noo sa buong mundo, tayo ay Pilipino."
Subalit nasaan na ito ngayon?
Nasaan na ang dangal ng Pilipino?
Nasaan na ang mga nagsasabing "Ako ay Pilipino"?
Siguro alam na natin ang kasagutan sa mga katanungang ito. Hindi tayo
bulag sa mga pangyayaring nasasaksihan natin araw-araw. Maraming mali
ang nangyayari sa kapaligiran natin. Marami ang mga Pilipinong kailanman
ay walang pagmamalasakit sa Pilipinas.
Maririnig mo sa mga kababayan mo araw-araw na gusto nilang umalis
ng Pilipinas dahil walang buhay dito. Marami ang galit sa kapwa niya
Pilpino. Maraming Pilipino ang ikinahihiya ang Pilipinas at nagsisisi
kung bakit dito pa sila ipinanganak sa miserableng bansang ito.
Marami sa mga kababayan natin ang hindi kilala kahit na mga bayani
natin. Mas pamilyar pa sila kina Mickey Mouse at Spider-Man. Mas marami
ang naghangad na maging estado na lang tayo ng US. At isa pang masakit
na nakikita ko ay nawawala na ang ating mga katutbong laro na nakamulatan
ko noong bata pa ako. PC games na ngayon ang uso. hindi ko na narinig
ang mga lumang awitin na gawa ng ating mga National Artists. Nawawala
na ang ating tradisyon.
Sana sa susunod na henerasyon ay matuturuan natin ang mga kabataan
na mahalin ang bayan natin kahit sa pamagitan lamang ng paggawa ng
mga simpleng bagay tulad ng paglalaro kunwari ng sungka, sipa, o taguan.
Mali siguro ang obserbasyon ko na ito kaya itama nyo ako kung mali
man ako. Nanghihinayang at natatakot lang kasi ako na balang araw
ay itatanong sa akin ng anak o apo ko kung buong lakas at taas noo
ko pa rin bang sabihin ang mga katagang "Ako ay Pilipino."
---------------
Si Hexel, 21, ng UP Diliman, ay estudyante habang buhay.
