MAY KAKAIBANG epekto ang pagpapakita ng Mars sa ating bansa.
Ito na lang ang pinakalohikal na paliwanag sa mga pinakahuling eksena
sa bawat sulok ng Pilipinas. Sa telebisyon, pinauulanan tayo ng karnabal
ng mga imahen-mga babaeng nababangasan ng mukha dahil sa pagsasayaw
habang inihahagis-hagis sa ere, mga tricycle driver at construction
worker na pinagsusuot ng lampin habang nagsasayaw ng otso-otso sa
ibabaw ng malalaking bloke ng yelo, sa ilalim ng mainit na sikat ng
araw, mga binata't dalagang ginagawang katatawanan ang anyo't kilos
upang magawaran ng titulong "Sexbomb Sexygirl" o "Mr.
Suave." Lahat ay sa ngalan ng ilang libong pisong premyo't ilang
oras na aliw sa mga pamilyang nanonood sa kani-kanilang mga tahanan.
At sino pa kaya ang hindi nakababalita sa away-bati nina Kris at
Joey? Sapaw na sapaw ang kaso ni Jose Pidal sa mga makabagbag-damdaming
linyang tulad ng "hinawakan ko siya sa balls." Pagkalipas
ng mga unos sa buhay ng isa sa ating mga pinakapaboritong public personality,
bigla ring umulan ang kanyang mukha sa iba't ibang mga patalastas-mula
sa whitening soap hanggang sa corned beef na may buo-buong karne ng
baka, naging mas makulay ang buhay-artista ni Kristeta. May bago pang
season ng kanyang game show, talagang next level na ang dating (mabuti
pa siya, samantalang ang programa ni Joey kasama ni Raymart, nasibak
at na-reformat). Talaga namang totoo ang sinabi ni Kris na "Hindi
ako magpapa-tummy tuck…I will survive."
Pero showbiz yun, puwedeng palusutin, puwedeng palampasin dahil showbiz
nga. E paano kung pati sa totoong buhay ay paulanan tayo ng kung anu-anong
kawirdohan, mga penomenong mas enigmatic pa kesa sa pagsikat ng Meteor
Garden, Meteor Rain at ng kung anu-ano pang Meteor na galing sa Taiwan
at Hongkong?
Mars na lang ang sagot. Ang strategic na posisyon na lamang ng mga
planeta ang makapagpapaliwanag kung bakit ang isang pangulong nangakong
hindi na tatakbo uli sa nalalapit na eleksyon ay biglang nagbago ng
desisyon sa harap ng madlang pinangakuan niya. Ang magkakaibang ritmo
ng mga rotasyon at rebolusyon ng iba't ibang celestial bodies ang
tanging makapagbibigay-saysay sa iba't ibang divine intervention na
humuhugot sa gravitational pull ng Pilipinas sa mga tahanan at kabuhayan
ng marami sa ating mga kababayan. Sa kasalukuyang planetary alignment
na lang maaaring umasa ang pagiging rasyunal ng patuloy na disgrasyang
dulot ng mga patayan at nakawan, patayan at nakawan sa napakaraming
magkakaibang lebel.
At sa pagdating ng mistulang supernova event ng 2003, ang pagdating
ni USA President George W. Bush sa Pilipinas ngayong Oktubre 18, ano
kaya ang mga naglalaro-laro sa isip ng kabataan natin ngayon? Habang
abala ang ilang mga organisasyon sa paghahanda ng engrandeng pagsalubong
kay George, naghanda ang Tinig.com ng mga artikulong tumatalakay sa
mga isyung kaugnay ng mga di-lohikal na pangyayaring nabanggit. Hindi
lamang sa pagdating ni Bush kundi sa kabuuang kalagayan ng bansa sa
kasalukuyan. Basahin natin ang iba't ibang mga pananaw, mungkahi at
pala-palagay sa mga usap-usapang posibleng makaapekto sa hinaharap
ng ating mga sarili at ng ating bansa.
Samantala, patuloy pa rin sa pagsirko ang mundo kasabay ng ating
mga personal na pakikipagsapalaran sa pamilya, kaibigan, kakilala
at di-kakilala. Makiusyoso tayo sa ilang mga artikulo, kuwento at
tula ng mga ka-Tinig na nabighani ng hiwaga ng kalawakan sa iba't
ibang malaki't maliit na paraan.
Ano kaya ang kapalarang ihahatid ng ating mga bituin? Habang hindi
pa natin nakikita ang mga malinaw na sagot, maging mas mapagmasid
tayo sa mga bagay-bagay na nasa paligid natin, mga bagay-bagay na
naaabot ng ating mga indibidwal at kolektibong karanasan. Maging alerto
tayo.
VLADIMEIR GONZALES
Patnugot sa Panitikan
