Akala ko kung sino na namang katrabaho ang nag-titrip sa'kin. Si
Michiko pala. Hindi ko alam kung pang-aasar ba o paglalambing lang
ang intro niya sa muli naming pagkikita, pero alin man sa dalawa,
ginantihan ko na lang siya ng pinakamatamis kong ngiti.
Kahit hanggang batian lang ang sukatan ng relasyon namin ni Michiko,
kilalang-kilala ko na siya. Siya ang tipo na kapag nag-a-aerobics
ay umaayaw sa kalagitnaan ng session kapag hindi na masundan ang mga
step. Siya ang tipo na kapag nag-weweights ay hindi na tinatapos ang
pag-woworkout kesyo raw nakakangawit, masakit at nakakapagod sa katawan.
Siya ang tipo na mas pipiliing gawing takbuhan ng kwentuhan ang aero
floor kaysa tumakbo't magpapawis sa treadmill. Ito ang pagkakakilala
ko sa kanya. Pero pumupunta lang naman si Michiko sa gym tuwing nag-aaway
sila ng kanyang boypren.
At paano ko nalaman?
Iisa lang naman kasi ang routine ni Michiko tuwing nandito 'yan.
Mag-a-aero, iinom sa drinking fountain, mag-a-aero ulit, may makikitang
kaibigan, makikipagkwentuhan, makikipagtawanan na para bang wala nang
bukas, mag-weweights, iinom ulit, makikipagdaldalan ulit, makikipag-asaran,
tapos mag-riring ang cellphone. Biglang magbabago ang aura ng mukha,
makikipag-usap sa cellphone na pinipigilan ang pagkainis. Tapos bababaan
ang kausap, matutulala, at kung minsan kapag talagang grabe ang kanilang
pinag-awayan, mangingislap-ngislap pa ang mga mata, maalimpungatan,
tapos mampipisil sa tagiliran ng kahit sinong kakilalang unang makikita.
Ganun lang naman ang routine ni Michiko sa gym.
Kailan kaya darating ang panahon na isasama niya ako sa kanyang routine?
Sana ang kaninang pagpisil niya sa mga pilit kong ikinukubling bilbil
ang maging simula.
Nung una ko kasi siyang nakita, gusto ko na siya. Kung pwede ko lang
siyang sagipin mula sa boypren niyang kupal, gagawin ko.
"Paano ba maalis 'to?" biglang hirit ni Michiko sa'kin
na hawak-hawak ang kanyang tagiliran.
"Bukod sa cardio, crunches, at diet, kalimutan mo na 'yang
boypren mo tapos mag-date tayo."
Muling pinisil ni Michiko ang love handles ko.
Nahimasmasan ako't nilunok na lang ang mga salitang tumatakbo sa
isipan.
