"PARA SAN 'to?"
Sa mga natitirang buhok ni sir Shaggy, ganun na rin siguro halos
ang bilang ng pagkakarinig ko sa tanong na 'to. Pero wala akong magagawa
kung di sagutin ang mga 'to. Kasama kasi sa trabaho.
"A, sir, 'yan po ang Rotary Torso! Okay po 'yan! Pampatanggal
ng bilbil!" sabi ko sa panglabindalawang kliyenteng hinawakan
ko ngayong araw, sabay demo sa harapan niya.
"Aba'y ayos 'to! Ayos 'to! Kelangan ko 'to!" sagot naman
ni sir Shaggy na tuwang-tuwa nang malamang makakatanggal ito sa kanyang
mga taba sa gilid ng kanyang lo waist na tiyan.
Ang Rotary Machine o "Bilbil" Machine ang isa sa pinakagamit
na weights machine sa gym. Para sa mga lalakeng may puson, sa mga
babaeng mukhang nagbubuntis ng isang batalyong tiyanak, sa mga tatay
na nakalunok ng bowling ball, sa mga nanay na may suot na salbabidang
gawa mula sa interior ng ten wheeler na trak, sa mga matronang may
sandamakmak na humps sa katawan, sa mga teeny boppers na may 200 %
body fat at para sa mga chikiting na napabayaan sa kusina, etong makina
ang kanilang maaasahan para dumating ang araw na masasabihan sila
ng kanilang kapamilya, kabarkada, kaibigan o kaaway na " Uy,
pumayat ka a!"
Sa wakas at tapos na rin si sir Shaggy. Napailing na lang siya sa
magkahalong sakit at sarap na naramdaman. Inapiran ako ni sir sabay
diretso sa fountain drink. Tinignan ko ang oras. Lunch break na! Matapos
magtrabaho para sa pagpapayat ng mga tiyan ng iba, tiyan ko naman
ang aatupagin ko.
Inalis ko ang name tag ko na nakasabit sa leeg ko sabay tuck out
ng uniform para makaramdam ang mga kliyente na break ko na't makaiwas
sa pagiging spotter boy. Naglakad ako palabas. Nasalubong ko ang iba
kong mga katrabaho't sa bawat salubong sa'kin ay hinihimas nila ang
kanilang tiyan para sabihing "kain ka?" kahit alam naman
nilang kakain nga 'ko. Ewan. Siguro awtomatik na lang talaga na ganun
ang sistema tuwing lalabas ka para magbreak. Ilang hakbang na lang
ang layo ko mula sa pinto nang biglang may sumitsit.
"Pogi!"
Tatlo kaming lumingon. Ako, isang pamintang may mala-Paquito Diaz
na bigote, at co-trainer kong sikat sa tawag na "Macho Man".
Siyempre, ako 'yung tinawag.
Lumingon ako para tignan kung sino ang tumawag sa middle name ko.
Laking gulat ko dahil si Ms. Rose, ang pinaka-iniiwasang kliyente
sa buong buhay ng mga taga-gym. Kilala siya bilang masungit, matapobre
at sa kanyang mala-bruhang hairstyle. Kahit na dinidiktahan na'ko
ng sikmura ko na lumabas na ng pinto, lumapit pa rin ako kay Ms. Rose
na sa pamamagitan ng kanyang mga kamay ay sinusuklay-suklay ang tila
tutong sa araw na buhok.
"Yes, mam?"
"Pa-assist!."
Wala akong nagawa kung di sumunod. Mabilis na naglakad si Ms. Rose,
papuntang gym area na talaga namang ikahihiya mong makatabi dahil
sa kakaibang hairdo. Ayaw mo mang tignan pero para na 'tong magnet
na nakaka-agaw pansin. Nag-walkathon na'ko para lang makasunod kay
Ms. Rose. Pinagtitinginan ako ng mga taong nasasalubong ko't parang
ipinagdasal na nila ang aking kaluluwa. Parang kinakausap nila ako
sa isip at pinagpayuhan na huwag na huwag akong magkakamali sa mga
kilos at pananalita ko't kung di ay siguradong ma-machine gunin ako
ng mga panunumpa ng reyna ng mambabarang. Huminto si Ms. Rose at humarap
sa'kin ng may pinakamasamang simangot na nakita ko sa'king tanang
buhay. Lumapit ako. Kinamot muli ni Ms. Rose ang kanyang bumbunan
hanggang sa magkandabuhol-buhol na ang kanyang buhok na kahit mga
kuto niya'y magtataka kung sa buhok ba talaga sila namahay. Biglang
binanat ni Ms. Rose ang kanyang kaliwang kamay at may tinuro.
"Para san 'yun?"
Sinundan ko ng tingin ang tinurong direksyon ni Ms. Rose. Pagtingin
ko, ang mahiwagang Rotary Torso. Wala pang dalawang minuto ang paghihiwalay
namin pero eto na naman kami't i-dedemo siya kung paano gamitin. Sumampa
ako't pinwesto ang sarili. Tumingin ako kay Ms. Rose pero hindi ko
siya matignan ng mata sa mata kung kaya't sa 80's na Bon Jovi niyang
buhok ako napatingin.
"A, mam, eto po ang Rotary Torso. Pampatanggal ng bulbol!"
Este bilbil.
Napatingin sa'kin si Ms. Rose. Lalong sumama ang simangot. Napalunok
ako. Dahan-dahan siyang lumapit sa'kin. Napahigpit ang kapit ko sa
Rotary. Anung idadahilan ko sa nasabi ko? Na mukha kasing bulbol na
buhol-buhol ang buhok niya kaya bulbol ang nasabi ko kaysa bilbil?
Pero wala ng oras para makahanap ng palusot. Dalawang dangkal na lang
ang layo ni Ms. Rose sa'kin. Pinababa niya 'ko. Sinunod ko siya kaagad.
Tinitigan niya ako ng masama sabay nilipat ang tingin sa Rotary Torso.
Mga ilang sandali niya itong tinitigan. Pagkatapos ay binalik sa'kin
ang titig na nakakatunaw sa sindak, sabay dahan-dahang gumapang ang
inuugat niyang mga kamay sa may bandang baba ng kanyang puson.
"Kailangan ko 'to."
Umiwas ako ng tingin at nakita ko si sir Shaggy sa gilid na tatawa-tawa.
July 20, 2003
