LORD, SANA matigil na ang mga kaguluhan sa Pilipinas. Ang ekonomiya
ng Pilipinas ay bumagsak na dahil sa pag-aaklas. Sana talaga, umunlad
na ang Pilipinas. At sana, guwapo ako.
May nagtanong sa akin dati kung sino ang mas pogi: si Jerry Yan ba
raw o si never-gonna-stop-never-ever-stop-ain’t-gonna-give-you-up
Vanness Wu? Sinagot ko na lang, “Ewan. Hindi ko naman pinapansin
ang F4.” Pa’no ko kaya sasagutin iyon kung biniyayaan ako
ng Maykapal ng kaguwapuhan? Siguro ang lumabas sa butsi ko no’n,
“Mas cute ako, hehe.”
Kung sinabi ko iyon at hindi ako guwapo, di sangkatutak na ‘kapal’
ang umaligid-ligid sa isipan ng babaeng iyon? Tsk. Ang hirap ng hindi
guwapo. Buti na lang mayroon akong angking talino. Sa kung saan na
lang ako pupulutin kung walang laman itong utak ko. Doon naman ako
madalas pinapansin eh, kasama ng aking mga talento. “Lagsh, ang
galing mo.” Pero, Lord, sana talaga guwapo ako. Gusto kong marinig,
“Lagsh, ang cute mo! [Marry me!]”
Lord, sadya bang ang kapalaran ko’y ganito?
Ate Bernadette, gusto ko sanang tulungan ang pinsan kong namomroblema
sa kanyang pag-aaral dahil working student siya. Wish ko lang magkaroon
siya ng scholarship, kahit sa STI lang. At wish ko lang, guwapo ako.
Iyong kaklase ko noong haiskul, naidedeklara niya na pogi siya. Kaya
naman ang yabang ng aura niya. Nakakainis! Iyong gusto mong batukan
sa sobrang pagkahambog.
Pero sana ako rin guwapong katulad niya. O kaya mas guwapo pa sa
kanya.
Kahit sinong babae nalalapitan niya, kasi alam niya na guwapo siya.
Hindi na siya nagdududa pa kung nagmumura ang babaeng kinausap niya
pagtalikod niya o kung hindi. Kung may maiinis mang babae sa kanya’t
sinabihan siya, “Ang feeling mo,” may panlaban siya kaagad.
“At least guwapo.” O kaya, “Guwapo pa rin.”
Guwapo ba siya talaga? No comment. Basta’t gusto ko, guwapo
ako. Promise, hindi ako magmamayabang katulad niya... pero puwede
rin. Kung mayamot man sila sa aking kaguwapuhan, nandyan pa rin naman
ang katalinuhan. Kahit hindi ako valedictorian, may binatbat naman
ako kahit papaano. Active pa ako sa mga extra-curricular na bagay.
Hayan na naman ako! Hinahanapan ko na naman ang sarili ko ng mga
dahilan para maipagmalaki ang sarili. Kung alam kong guwapo ako, di
kuntento na ako.
Kuya Willie, hindi tinupad ni Ate Bernadette ang wish ko. Ikaw na
lang sa Willingly Yours. Sana magkaroon na ng sariling computer unit
ang kuya ko sa Diliman para hindi na siya umuuwi dito sa amin sa Pampanga
araw-araw para mag-type ng mga homework niya sa Journalism. At sana,
guwapo ako.
Iyon bang tipong lady at bading killer? Iyong maraming nagnanasa
sa iyo? Iyong kulang na lang eh gusto kang i-corner sa may CR para
molestiyahin? Iyong nakaka-uno ka sa mga subject kung saan ang teacher
ay bading? Iyong tipong aabangan ka lagi araw-araw para makumpleto
ang araw nila? Iyong tipong isang daan mo lang naglalandi na sila?
Iyong laman ka lagi ng mga daydream ng mga nagnanasa? Iyong hindi
ka nahihiyang makipag-EB o makipag-blind date? Iyong lagi kang ginagayuma’t
kinukulam? Iyong puwede ka na sa showbiz? ‘Know what I’m
sayin’?
Syet. What’s happening to me? Puro ako sana. Alam ko naman hindi
iyon matutupad ni Willie. Ni Bernadette. Ni Lord.
Sana talaga guwapo ako. Kahit pa may utak ako.
Iyong ibang babae sa mga pageant, ang paplastik. Kesyo mas pipiliin
daw ang talino kaysa sa kagandahan. Asus! Nagpakipot pa, eh gustong-gusto
naman na maganda sila, kahit na hindi marunong mag-Ingles. Idol ko
nga iyong isang contestant. Sinagot niya beauty, kasi daw ang talino
puwedeng makuha sa sipag at tiyaga.
Iyong kayang mga guwapong hindi masyadong magaling sa pag-aaral?
Siguro wish naman nila matalino sila. Trade? Huwag na. Puwede pa sana
noong maliit pa ako. Kasi nga, puwedeng maangkin ang talino.
Eh pa’no iyong mga artistang guwapo na kahit walang alam ay
kumikita ng pera sa showbiz? Tsk. Itchampeyr.
Haaaay... Dapat siguro makuntento na ako. After all, kung walang
mga taong hindi guwapo, wala ring taong guwapo. Heto na naman ako!
Naghahanap ng pampakalma.
Ipagdarasal ko na lang na sana tumigil na sa pagluha ang ating mga
kababayan sa Mindanao... At sana...
