"PARE, BAKLA si Jude, yung anak ni Erap, yung action star dati,
yung Vice President na ngayon." Yun ang sabi mo sa akin isang
araw habang naghihintay tayo ng teacher. First year high school tayo
noon. "Oo, sabi sa balita, syota niya raw si Dranreb, yung nasa
That's Entertainment dati, sikat na child star daw siya noon, pero
adik na siya ngayon." "Oo, tama, sila nga, bakla sila pareho,
pare, bakla si Jude," sabay turo sa isang kaklase natin, kapangalan
niya kasi si Jude, yung bakla, yung syota ng adik. Mga apat na taon
mo rin siyang pagtatawanan, kasama ni Elsie, tatawagin mo siyang palaka,
si Jepoy, na sasabihin mong kamukha ni Garfield na nagkaroon ng Down
Syndrome, si Trina, yung kaklase nating katunog ng ari ng lalaki ang
apelyido, pati ako, dahil minsan ay mga taong payat na naghihikab
naman ang maiisipan mong pagtawanan. Di ko naman minasama, inisip
ko na lang na ganun ka talaga. Mabait ka naman kung tutuusin, sabi
ko, nagsasabihan pa nga tayo ng mga hinaing sa buhay, mga sama ng
loob, kapag pareho tayong walang makausap. Ganun ka lang talaga siguro,
sabi ko. Kahit nga ako'y nakikitawa sa mga inaasar mo, sa pagkakatanda
ko. Ganun lang talaga. Di na tayo masyadong nagkita pagkatapos ng
high school. Nadagdagan na rin ang timbang ko, nabawasan at nadagdagan
at nabawasan uli, pagkatapos ay nagkita tayo sa SM. Tuwang-tuwa ka,
at ako rin naman. Hiningi mo ang numero ko, may cell phone na pala
ako noon. Hindi ko na nasabing pangatlong telepono ko na yun, na nanakawan
na ako nang dalawang beses at pati pitaka'y nadukot na rin sa ilang
pagkakataon, nagmamadali kasi tayo pareho. Nanonood ako ng palabas
ni Korina Sanchez (na papalitan ng palabas ni Kris Aquino na papalitan
ng palabas nina Boy Abunda at Kristine Bersola na papalitan ng Mexican
Telenovela na papalitan ng Tsinovelang pinagbibidahan ng F4, yung
Taiwanese na boyband) noong tumunog ang telepono ko. Ikaw yung nag-text.
"Kamusta pare," sabi mo. "Okey lang," sabi ko.
Tapos ay nagkumustahan tayo ng kung anu-ano at kung sinu-sino, ng
mga dating kaklaseng nasa Amerika na, mga dating kaklaseng nabuntis,
mga dating kaklaseng nag-asawa, mga dating kaklaseng matatapos na
sa kolehiyo. Saka mo sinabing huminto ka na sa pag-aaral. "Trabaho
muna," sabi mo. May sumunod agad na mensahe, "pare, magpapaalam
na muna ako, di naman kasi akin itong telepono, sa girlfriend ko ito."
Sumagot naman ako agad, "O, may girlfriend ka na pala,"
sabi ko. Mayamaya'y tumunog uli ang telepono ko, pero di ko natingnan
ito agad. Nasa TV kasi si Dranreb, yung dating child star na dating
adik na dating syota ni Jude, yung anak ng dating action star na naging
Vice President na naging President na naging Ex-President. Sabi ni
Korina, di na raw adik si Dranreb, di na rin daw sila ni Jude. Pero
sabi ni Dranreb, sabi niya kay Jude "pare, kung nakikinig ka,
kung nanonood ka pare, mahal kita pare, kahit ano'ng mangyari."
Di ko matandaan kung ano yung eksaktong sinabi, magulo kasi magsalita
si Dranreb, pero di na siya adik. Saka ko lang dinampot ang telepono.
Siyempre'y sa iyo pa rin galing ang mensahe, sa telepono mong telepono
pala ng girlfriend mo. "Kilala mo siya," sabi mo, "Si
Elsie, yung kaklase natin dati, natatandaan mo ba siya?" Sa isip-isip
ko, sabi ko'y "oo, si Elsie, yung tinatawag mong palaka dati?
Yung inaasar mo kasama nina Jude, Jepoy, Trina, kasama ko?" Pero
di ko na yun sinabi. Tumingin uli ako sa TV, andun pa rin si Dranreb,
umiiyak siya, di ko alam kung dahil masaya siya o malungkot, pero
sabi niya di na siya adik, kaya dapat masaya siya. Kinuha ko uli ang
cell phone, pinindot ang mga letra sa keypad, ipinadala ang mensaheng
"nasa TV si Dranreb, yung adik dati, di ba syota niya si Jude,
yung bakla dati?" Hinintay kong sumagot ka, na sabihing "oo
pare, bakla si Jude," pero hindi, hindi ka na sumagot. Hindi
ka na nag-text gamit ang telepono ng girlfriend mo. Hindi na rin kita
nakita simula noon. Pero si Jude, si Dranreb, yung iba, paminsan-minsa'y
nakikita ko pa rin.
