MINSAN KO nang narinig ang awiting may ganitong lyrics: "May
pulis, may pulis sa ilalim ng tulay." Madalas itong awitin sa
mga umpukan sa mga tindahan, lamayan, at maging sa mga kasiyahan na
nauuwi sa kantyawan. Kamakailan lamang ay narinig ko na naman ito
sa isang patalastas sa telebisyon. Hindi ko maunawaan noon ang gustong
ipabatid ng awting ito sa mga nakikinig, basta't ang alam ko lang
ay masaya kong napapakinggan ito habang sinasaliwan ng tugtog ng gitara.
Subalit nang ako ay mamulat sa mga nangyayari sa kapaligiran, nagkaroon
ng malaking kahulugan sa akin ang awiting ito. Naitanong ko minsan
sa aking sarili kung hindi kaya isang malaking pambabastos ang awiting
ito sa mga kapulisan ng ating bansa? Hindi kaya tila lumilitaw na
napakababa ng mga pulis? Bakit sa ilalim ng tulay siya nakapirmi?
Ano ang ginagawa niya roon? Takot ba siyang mainitan ng araw? Nagpapalaki
ba siya ng tiyan sa lugar na iyon? Naghihintay ng tong?
Marahil ang ganitong pagtingin sa mga kapulisan ay bunga narin ng
ipinapakita ng ating lipunan ukol sa kanila. Binibigyan nila ng hindi
magandang imahe ang mga pulis, gaya halimbawa ng mga palabas sa telebisyon.
1. Laging huling dumating ang mga pulis sa isang krimen. Asahang
pagkatapos ng barilan ng bida at kalaban ay doon palang darating ang
mga pulis.
2. Lagi silang kasangkot sa mga krimen at ipinagbabawal na gamot.
Kadalasan sila ang lider ng sindikato.
3. Nangongotong sila.
4. Hindi sila pinagkakatiwalaan ng mga taong bayan.
5. Sila mismo ang lumalabag sa batas.
6. Ginagawa silang mga katawa-tawa sa mga pelikulang pang komedya.
Ilan lang ito sa mga napansin kong laging imahe ng pulis sa mga palabas
sa telebisyon. Hindi ba't ang mga ito ay nagpapababa sa imahe ng mga
kapulisan? Na kaya sila ay nasa ilalim tulay sapagkat bumababa ang
pagtingin ng tao sa kanila at nagiging daan ito upang sila ay hindi
pagkatiwalaan?
Kailan kaya mapapalitan ang lyrics ng kanta at maging "May pulis
sa itaas ng tulay?" HIndi lahat ng pulis ay ganito ang ginagawa.
Sana'y gawing maganda ang imahe nila sa paningin ng nakararami upang
manumbalik ang pagtitiwala ng mamamayan sa kanila at tumaas ang paggalang
sa kanila. Isang paraan marahil ay ang isama sa pagbabalita sa telibisyon,
radyo at pahayagan ang mga nagagawa nilang kabutihan at kabayanihan
gaya ng:
a. Pagsagip sa mga nagiging biktima ng krimen.
b. Pagbabalik sa may-ari ng mga napupulot nilang kagamitan.
c. Mahusay na pagtatrapik sa mga kalsada
d. Paggabay sa mga matatanda kapag tumatawid sa daan.
e. Pagtataya ng sariling buhay upang mailigtas lamang ang buhay ng
iba.
Ilan lang ito sa kanilang mga mabubuting nagagawa. Sa aking palagay,
makabubuti ito upang maging maganda ang kanilang imahe at lalong maging
masigasig sa kanilang pagtatrabaho. Naniniwala ako na sa darating
na panahon ay titingalain silang muli at hindi na muling makikita
sa ilalim ng tulay.
---------------
Si Nestor Calaguas De Guzman ay guro sa Filipino sa Angeles University
Foundation.
