DUMADAGUNDONG NA balita ngayon sa kilusang masa ang pagbubuo ng partido
ng kabataan na lalahok sa eleksiyong party-list sa susunod na taon.
Hindi maikakaila ang mahalagang papel ng kabataan sa kasaysayan ng
bansa. Mula sa pakikibaka para sa kalayaan laban sa mga dayuhang mananakop
hanggang sa paghamon sa diktaturya ni Marcos, isang muog na bakal
ang pwersa ng kabataan. Aktibo sa pulitika ng lipunan, matibay na
sandigan para sa pagbabago.
Muling ipinamalas noong EDSA 2 ang dinamismo ng kabataan upang mapabagsak
ang rehimeng Estrada. Malaki ang ambag ng sektor upang maging lubusan
ang tagumpay ng People Power. Subalit habang kinilala ng bagong rehimen
ni Pangulong Macapagal-Arroyo ang kontribusyon ng kabataan, hindi
nito pinansin ang kahilingan para sa mataas na badyet sa edukasyon
at pagkontrol sa tumataas na matrikula. Ilang buwan matapos ang EDSA
2 ay luminaw na wala itong pinagkaiba sa pinatalsik na administrasyon
at sa katunayan ay patuloy itong naging mas masahol hanggang sa kasalukuyan.
Mula sa pagkadismayang ito ay nabuo ang Nagkakaisang Kabataan Para
sa Sambayanan (United Youth for the People) o Anak ng Bayan. Aktibo
ang kabataan sa pulitika subalit wala itong sariling partido na ipaglalaban
ang interes nito sa loob ng gobyerno. Sa tuwing halalan ay sinasabi
ng mga pulitiko na susuportahan nila ang kapakanan ng kabataan. Subalit
hanggang ngayon, nananatiling madilim ang kinabukasan ng kabataan
dahil sa lumalalang kahirapan, bulok na edukasyon, kasalatan sa trabaho,
katiwalian sa pamahalaan at karahasan sa lipunan.
Pinangunahan ng mga progresibong organisasyon ng mga kabataan tulad
ng ANAKBAYAN, League of Filipino Students, Student Christian Movement,
National Union of Students, College Editors Guild at mga miyembro
ng Estrada Resign Youth Movement ang pagtatayo ng Anak ng Bayan bilang
bagong larangan upang maisakatuparan ang mithiin ng tunay na pagbabago
sa lipunan.
Sa haba ng mga dinaanang pagsubok ng kilusang kabataang estudyante
sa bansa ay nakaipon na ito ng sapat na lakas upang maitayo ang isang
nagsasariling partido. Puhunan ang nakalatag na malawak na pambansang
makinarya at impluwensiya sa mga eskuwelahan at komunidad upang madaling
makapagbuo ng partido at lumahok sa eleksiyon.
Plataporma ng Anak ng Bayan ang pagtitiyak sa karapatan sa edukasyon
at trabaho ng kabataan at mamamayan. Itataguyod nito ang pulitika
ng pakikibaka at pag-asa laban sa namamayaning pulitika ng trapo na
pinapakinabangan lamang ng iilan at mga dayuhan. Bilang henerasyon
na naging saksi sa pagtataksil ng mga lider ng bansa, tayo rin ang
kikilos upang maging malinis ang pamahalaan at mapaglingkuran ang
sambayanan.
Ngayon, higit kailanman, ang lakas, giting at talino ng kabataan
ay kailangan ng bayan para sa isang maningning na kinabukasan. Ang
boses ng kabataan ay dadalhin ng Anak ng Bayan sa loob ng pamahalaan.
Ito ang partido ng kabataan na binuo ng mga kabataan, pinamumunuan
ng mga kabataan at para sa interes ng kabataan.
Higit sa lahat, ito ang partido ng mabubuting anak ng bayan.
---------------
Si Mong ay pangulo ng National Union of Students of the Philippines
at dating chairperson ng UP Diliman Student Council.
