Ako,
si ___________________, ay sumusumpang gagampanan ang aking mga tungkulin
bilang mamamahayag sa panahon ng ligalig at hikahos, sa panahon ng
opresyon at agresyon.
Magsisilbing gabay ang naging buhay ni Dekano Armando J. Malay, magiging
inspirasyon ang kanyang mga naging sakripisyo, at isinusumpa kong
isusulong ang kanyang pakikibaka para sa panlipunang pagbabago.
Patuloy kong isusulat ang pambansang kalagayan, at susuriin ko ang
lipunan batay sa kasaysayan ng kasalukuyan at kahihinatnan ng nakararaming
mahihirap.
Katulad ni Kasamang Armando Malay, lalabanan ko ang anumang panunupil
sa karapatang pantao at kalayaan sa pamamahayag.
Sisikapin kong magpakahusay sa aking piniling propesyon sa pamamagitan
ng obhetibong pagsusulat at pakikiisa sa pagkilos para sa isang magandang
bukas.
Ang lahat ng ito ay isinusumpa ko sa okasyon ng pagyao ng isang kasama
sa pakikibaka, isang institusyon sa pamamahayag at isang tunay na
Pilipino!
---------------
Binigkas ng mga mamamahayag sa parangal kay Dean Malay noong ika-18
ng Mayo, 2003 sa UP Diliman.
