CIGARETTE SMOKING is dangerous to your health. Drink moderately.
Ang isang pangkaraniwang manonood ng TV ay maaaring mabighani ng
pantasyang mundong nais likhain sa patalastas ng sigarilyong Fortune
o mapaniwala sa pagkakaibigang nabubuo sa pag-inom ng San Miguel Beer
subalit sa dulo ng patalastas, at sana'y mapansin ito, ay mababatid
niyang hindi ito iniendorso nang buung-buo ng pamahalaan dahil sa
masamang idudulot nito sa katawan ng tao. Bagama't kapos sa sinseridad,
kahit paano'y nagagabayan at napoprotektahan ang publiko sa pagpili
ng mga produktong bibilhin sa palengke.
Makapangyarihan ang TV sa paghubog ng katotohanan. At kadalasa'y
tinatanggap ng madla ang ipinapalabas nito bilang absolutong katotohanan
nang walang kritikal na pagsusuri. Kung kaya't may naiiwan pa akong
pagpapahalaga sa mga babala sa mga komersyal bilang minimum na proteksyon
sa mga konsumer.
Ganoon na lamang ang laki ng aking pagkabahala sa paglabas ng mga
komersyal ng mga eskuwelahan nitong mga nakaraang buwan. Halimbawa,
robotics daw ang itinuturo sa isang computer school. Trabaho pagkagraduate
ang pangako naman ng isang eskuwelahan. World-class kaliber daw ang
mga graduate sa isang pamantasan. Magiging klasmeyt mo siNA Kristine
Hermosa at Juday sa eskuwelahang iniendorso nila.
Hindi ito simpleng paglalahad ng serbisyong inaalok ng mga eskuwelahan;
matindi ang panlolokong ginagawa sa kapakanan ng publiko na ikinukubli
ng maaamong mukha ng artista, magarbo at tila sopistikadong teknik
na ginamit sa patalastas, at ang mismong swabeng epektibo ng TV sa
pagdala ng mensahe sa nakakarami. Pero bago tayo mapalawig dito, kailangang
ipaliwanag muna natin ang kahulugan ng paggawa ng komersyal ng mga
eskuwelahan.
Una, ito ay tanda ng pagpasok at pagdomina ng malaking negosyo sa
sektor ng edukasyon. Hinahalintulad ang edukasyon sa iba pang kalakal
na kailangang i-package nANg mabuti at ibenta sa publiko batay sa
umiiral at persepsyong demand na trabaho. Kung parang kabuteng nagsulputan
ang mga computer school noon, ngayon naman ay umuusbong kung saan-saan
ang mga caregiver institution dahil ito ang may mataas na demand sa
abroad. (Kahit si Amable Aguiluz ng AMA ay may St. Augustine na para
sa paghubog ng mga caregiver.)
Pangalawa, ito ay tanda ng desperasyon. Kung tutuusin, hindi problema
noon ng mga eskuwelahan ang enrolment. Pangarap ng bawat Pilipino
ang makatuntong sa kolehiyo at hindi na kailangang suyuin ang mga
kabataan na mag-aral. Subalit dahil sa walang tigil na pagtaas ng
matrikula taun-taon, bumulusok nang husto ang enrolment sa malalaking
pribadong pamantasan. Idagdag pa ang pagkadismayang idinudulot sa
mga kabataan sa nakikita nilang bata-batalyon ng mga nakatapos ng
kolehiyo pero wala namang trabaho. Kaya ngayon, sa TV, dyaryo at naglalakihang
billboard sa kalye, andyan ang anunsyo ng mga eskuwelahan at ang nilalako
nilang tipo ng edukasyon.
Marami ang nabibiktima sa panloloko ng mga eskuwelahan. Enrolment
pa lang ay nalulula na ang mga estudyante sa taas ng bayarin. Hinahanap-hanap
ang pangakong abanteng pasilidad subalit hindi pala ito pwedeng gamitin
ng lahat. Kahit ang kurikulum at eskuwelahan mismo ay hindi pa pala
accredited ng CHED. Reklamo sa amin ng mga estudyante sa isang international
business school na malaking kabalintunaan diumano ang world-class
teaching na inaanunsyo sa TV dahil part-time teachers lang ang kinukuha
ng eskuwelahan na palaging absent, pagod at hindi marunong magturo.
Ang ipinagyayabang na kagyat na trabaho pagkagraduate ay isa palang
ilusyon na walang pinagkaiba sa mga komersyal ng Axe deodorant.
Dumadaan ba sa screening ang mga komersyal ng mga eskuwelahan? Kung
ang mga patalastas ng gamot ay aprubado muna ng Bureau of Food and
Drugs, dapat ganun din sa mga eskuwelahan ng CHED. Libu-libong pera
at kinabukasan ng isang kabataan ang nakasalalay sa inaanunsyo ng
mga eskuwelahan, tama man o (kadalasan) mali. Dapat pag-isipan ng
gobyerno kung paano pangangalagaan ang interes ng publiko. Kailangang
ipagbawal—at dapat bigyan ng leksiyon ang mga eskuwelahang tahasang
nagsisinungaling sa edukasyong kaya nitong ibigay.
Payag naman kaming ituloy ang pagsahimpapawid ng mga komersyal ng
mga eskuwelahan basta't dapat ilagay sa dulo ang isa sa mga sumusunod
na STUDENT WARNING: High tuition fees guaranteed, quality education
not inclusive, at contractual employment after graduation assured.
