Mariing atas ng araw
Sa buwan: dapat ipinid
Ang mata, 'wag magpabalong
Ng liwanag, 'wag magluwal,
Talukap ipambilibid
Sa mga tinging mapusyaw.
'Pagkat umaga'y daigdig
Ng haring sa ginto'y gumon.
Bab'la ng araw: balaraw
Ang titig, nakapupunit.
Ngunit 'sang umaga, buwan
Ay dumilat, pumurikit.
Kamay ng araw, kumuyom,
Leeg ng buwan, sinakal.
Sumigaw nang alumpihit:
Pula na naman ang buwan,
Duguang mata sa langit.
Galos na ayaw maghilom,
Sugat na di mapatahan,
Hiwang hindi masinulid.
---------------
