BAGAMAT UNANG nabasa
sa Internet noong Pebrero 2001 ang paborito ninyong e-zine, ang aktuwal
at kumpletong unang isyu ay lumabas noong Abril 2 ng taong nabanggit.
Kaya naman dalawang taon na ang Tinig.com.
Mula sa isang tago at di-pansin na site sa Internet, ngayo'y masasabing
kilala na patuloy na nakikilala ang Tinig.com. Kung dati'y masuwerte
nang may sampung bisitang maligaw sa site sa loob ng isang buwan,
ngayo'y umaabot na sa hanggang pitong libo ang visits nito sa bawat
buwan. Mahigit isandaan na rin ang mga nakapag-contribute nang kahit
minsan sa nakalipas na 30 isyu natin.
Subalit dahil sa kakulangan ng resources at panahon, may mga buwang
hindi nasunod ang dalawang beses na paglabas ng Tinig.com. Ngayong
pumapasok tayo sa ikatlong taon, pipilitin nating masunod ang regular
na paglabas.
Sa ating ikalawang anibersaryo, i-welcome din natin si Francis Acero,
isang mahusay na manunulat na nagtapos sa Kolehiyo ng Pangmadlang Komunikasyon sa UP.
Sa isyung ito nagsisimula ang kanyang kolum na tatawaging Elitista.
Samantala, muli nating inihahanay ang mga layunin ng Tinig.com:
-
Maging venue for free expression
kung saan maipapahayag ang sentiments ng mga kabataang Pilipino
sa iba't ibang usapin;
-
Mahikayat ang mga kabataan na mag-share
ng kanilang mga kaalaman, karanasan at opinyon;
-
Maisulong ang makabayang kaisipan;
-
Manawagan ng pagkilos sa mga partikular
na usapin;
-
Maisulong ang pagsusulat at pagbabasa
lalo na ng Panitikang Pilipino; at
-
Makatulong sa mga kabataan sa pagbubuo ng
informed opinion.
Patuloy tayong nakikipagtulungan at makikipagtulungan sa mga indibidwal
at pangkat na may kaparehong layunin.
Sa kasalukuyang isyu ng giyera sa Iraq at kaguluhan sa Mindanao,
halimbawa, patuloy nating inaanyayahan upang maglathala ng kanilang
mga pahayag at impormasyon ang mga organisasyong lumalaban sa digmaan
sa Iraq, humihiling ng pagbawi ng suporta rito ng pamahalaan, at nananawagan
ng kapayapaan sa Mindanao.
Ang Tinig.com din ang nagpasimula ng online campaign ng Filipino
Youth for Peace, na sana ay patuloy ninyong suportahan sa pamamagitan
ng paglagda sa pahayag at paglalagay ng ating button sa inyong websites.
Sa gitna ng mga pasulput-sulpot na usapin at suliranin, hindi matitinag
ang Tinig.com sa pagsisikap na maging tunay na tinig ng mulat at makabayang
bagong salinlahing Pilipino.
Maraming salamat sa dalawang taong suporta at sana'y maging maluwat
ang ating pagsasama!
EDERIC P. EDER
Patnugot
---------------
