Kagabi, salubong-kilay mo akong tinitigan.
Muli mong pinaglimian kung luha ba o pawis
ang ikinakatas ng aking babasaging balat.
Tinanganan mo ang aking leeg.
Kinumbinsi mo ang sarili na masokista ako:
panighaw na nagpapasakal.
Matapos sairin, pinasirko sa hangin.
Binilang mo kung ilang beses akong umikot
bago tuluyang maging bubog sa sahig.
Paggising mo kinaumagahan,
bulsa ang iyong unang sinapo.
Nag-aalburoto ito tulad ng iyong sikmura,
Kunsumido kang nagpapapadyak.
Bumaon ang ilang piraso kong ngipin
sa iyong talampakan.
---------------
Si Mykel ay bokalista ng bandang "Petroleum Kelly." Dati
siyang Kultura Editor ng Philippine Collegian. Mahilig siya sa Pusa.
