Nagmartsa manen dagiti putot ti ling-et,
(isuda a nabuniagan iti union ti saem)
iti kalye ti Mayo a dangadang ti maingel
nga awanan-nagan, bannuar ti pagilian
a mangmangged, santo a di met kanonisado,
patron latta dagiti balo daydi namasaker
a parbangon ti aginaw a kappia.
Agdayyengda iti kalangiking ti baria,
iti saibbek ti lua, iti sennaay ti eppes a dawa
manipud kadagiti kinelleng daydi amada,
nga itan, pinatituluan ti agrario nga arsab:
hasienda ti nailian nga ayat.
Iwagaywayda ti daradara a plakard,
testamento ti ulila a bisin, ladawan ti gawat
a di met koma gawat, iti panawen
ti gambang a babai iti gambang met laeng
a trono, nagmaskara iti kari ken isem
a plastik a nabatekan iti bullalayaw ken bituen.
Pagammuan, agtapaw iti nalabbaga a tangatang
ti naabangan a lungon ti naimassayag a nagan
ti tagainep, batonlagip ti umel a buteng itan.
Ket ipalagip ti ngudo ti kasado nga igam:
isu, ubbing, ti taeng ti nabangles nga atang!
Ayna, tiliwenda ti saem ket itabonda
iti estoria ti ili: pannakaipatli, dara ken lua,
isuratda iti angin, tapok, pader, kalsada:
daytoy ti sariugma ti agungar a padaya.
---------------
