| Daluyong |
 |
| Mong
Palatino |
SA PANGUNGUNA nina Ethan Hawke at Winona Ryder (Reality Bites),
magkakaroon ng reunion ang mga nagpasikat sa Gen-X upang pagmuni-munihan
ang nakaraang sampung taon. Dito naman sa Pilipinas ay patuloy ang
paghahanap ng kategoryang kakatawanin ang kabataang Pilipino sa
kabuuan. May Generation X,Y, Z at ngayon ay may Gentext (are you
one of us?).
Bagama't nagkakaiba sa estilo, pare-pareho ang inilalako nilang
konsepto kung sino at ano ang kabataang Pilipino sa (post)modernong
panahon: mall creature, party-hopper, makukulay ang mga suot na
designer clothes at jeans, at siyempre bumibili ng bagong modelo
ng cellphone.
Kung manonood ka ng TV at papasok sa department store, iisipin
mong tumpak ang kanilang kategorya. Mapapaniwala ka na si Britney
Spears ang modelong kababaihan ng mga Pilipino imbes na si Gabriela
Silang at prepaid credit ang nangungunang problema ng mga kabataan.
Ginagatungan pa ito ng akusasyon tungkol sa diumanong kawalan daw
ng kamalayang pangkasaysayan (historical amnesia) ng bagong henerasyon
ng mga Pilipino. Paboritong halimbawa ang paggawa ng pelikulang
Dekada '70. Nahihirapan si Direk Chito Rono na kumuha ng tamang
emosyon mula sa mga nagluluksa sa pagkamatay ng isang aktibista.
Dahil tila nakalimutan na ang kolektibong pagdurusa ng sambayanan
noon, pinayuhan ni Direk Chito ang mga tao na ang isiping namatay
ay si Rico Yan. Biglang lumabas ang luha ng mga extra sa pelikula.
Tatanggapin ko na sana ang taguring Gentxt, Gen-X at iba pang pagkutya
sa kabataan kung hindi naganap ang dalawang malalaking pag-aalsa
sa bansa: ang EDSA Dos at ang katatapos lamang na February 28 Peace
Rally.
Pinatahimik ng EDSA Dos ang mga nagsasabing walang pakialam ang
mga kabataan sa mga nangyayari sa lipunan at gobyerno. Pinatunayan
nating hindi lamang mga gimik at hedonistang aliw ang pinagkakaabalahan
natin kundi pati mga usaping pulitikal na may tuwirang kaugnayan
sa ating kinabukasan.
Noong nakaraang Pebrero 28 naman ay muling dumagsa ang mga mga
kabataan sa Quirino Grandstand bilang pagtutol sa nakaambang gera
ng US laban sa Iraq. Nagmistulang reunion ng EDSA Dos ang okasyong
ito sa pagdalo ng iba't ibang eskuwelahan. Umalingawangaw mula Katipunan,
Mendiola, Taft, sa Maynila at sa buong bansa ang nagkakaisang tinig
ng kabataan para sa tunay na kapayapaan.
Hindi itinuloy ng UP Manila ang kanilang student council election
para makadalo ang mga mag-aaral sa rali. Kapit-bisig ang administrasyon
ng mga pamantasan at mga estudyante sa pagmartsa papuntang Luneta.
Bihira lang natin ito makita lalo na't sa araw na yun ay final exams
ng mga eskuwelahan at huling araw ng konsultasyon para sa pagtaas
ng matrikula. Pasiklaban ang mga eskuwelahan sa pagdadala ng mga
nagsisilakihang plakard, poster at banner. Napuno ang Luneta ng
mga makukulay na bandila at malikhaing slogan laban sa gera.
Kung ako ang Pangulo, pakikinggan ko ang boses ng kabataan at mamamayan.
Ang pagtindig ng kabataan para sa kapayapaan ay sumusunod sa matagal
ng pakikiisa ng kabataang Pilipino para sa kapayapaang nakabatay
sa katarungan. Ang mga nauna sa atin ay tumindig laban sa Vietnam
war at pananatili ng US Bases sa bansa. Ngayon naman ang henerasyon
natin ay kumikilos laban sa napipintong gera sa Iraq.
Ang mahalaga'y pinili nating huwag lang manahimik kundi gumawa
ng kongkretong hakbang upang pigilin ang gerang ito na walang batayan
at ang suporta ng ating pamahalaan dito ay tunay na nakapagngangalit.
Sino ba talaga ang kabataang Pilipino? Oo, nagpupunta tayo ng mall,
gumigimik at sumusunod sa uso. Subalit hindi lamang dito umiinog
ang ating buong buhay. Ilang beses na nating ipinakita ang ating
mabisang lakas para sa pagbabago na higit pa sa pagkakahon sa atin
ng kulturang kanluran bilang Gen-X o Gentxt.
Tayo ang henerasyong bumuwag sa ROTC na ilang dekadang sinubukan
ng mga nauna sa atin. Sa ating sama-samang pagti-text ay nakatulong
para magdesisyon ang Korte Suprema at Sandiganbayan na pabor sa
panig ng mamamayan hinggil sa kaso ng dating Pangulong Estrada.
Minsan na nga nating pinutakte ng mga galit na text at napilitang
magshut down ang text feedback program ng pamahalaan nang tumutol
tayo sa buwis na ipapataw sa mga gumagamit ng prepaid. Kalimutan
man natin itong lahat, at maliitan man ng iba, subalit hindi makukuha
sa atin ang dakilang partisipasyon natin sa Edsa at Luneta—mga panandang-bato
sa ating paggigiit ng isang mas maaliwalas na bukas.
Anumang kategorya ang ipataw sa atin ay hindi mapipigilan ang patuloy
nating pagreimbento sa ating mga sarili bilang mabubuting anak ng
bayan. Sa ngayon, hangga't hindi pa nakokompromiso ng komersyal
na kultura ang kabuluhan nito, hayaan niyong imungkahi namin (mula
sa NUSP- National Capital Region chapter) ang pagkilala sa atin
bilang Gen-Peace, mga kabataan ng People Power 2 na naninindigan
para sa kapayapaan.
