Sanay na ang iyong tumbong
sa lamig ng mabatong sahig.
Kinakausap mo ang hangin
habang nakalatag ang iyong mga saging.
Sumisigaw nang nakapinid ang bibig.
Marahil dinadalit mo
na umulan ng mga bungangang
ngunguya sa 'yong panindang matamis.
Kasabay mong hihilinging wala na sanang
mabiktima ang diabetes.
Sapul ng iyong mga titig
ang naglilipanang dahon
at hinihiraya mong maging asukal
ang makulimlim na langit
habang ang iyong mga paa'y
matamlay na pumapadyak
upang bugawin
ang mga langgam.
---------------
Si Mykel ay bokalista ng bandang "Petroleum Kelly." Dati siyang Kultura Editor ng Philippine Collegian. Mahilig siya sa Pusa.
