SUMAPIT NA tayo sa ikalawang hati ng Enero. Makasaysayan sa ating
bansa ang ikalawang hati ng Enero sapagkat ginugunita natin sa panahong
ito ang tatlong sigwa sa ating nagdaan—isang sigwang iniumang
sa sambayanan at dalawang sigwang yumanig sa mga bulwagan ng kapangyarihan
at pribilehiyo.
Sa ikalawang hati ng Enero 2003, ginugunita natin ang ikalawang anibersaryo
ng pag-aalsang People Power 2, ang ikalabing-anim na anibersaryo ng
Masaker sa Mendiola, at ang ikatatlumpu't tatlong anibersaryo ng Sigwa
ng Unang Sikapat o First Quarter Storm (FQS) ng 1970.
Enero 16, 2001 nang sumiklab ang People Power 2. Ibinunsod ito ng
masidhing pagkapoot ng bayan sa tangkang paghadlang sa katarungan
ng mga kampon ng noo'y Pangulong Joseph "Erap" Ejercito
Estrada, na noo'y nililitis ng Senado sa harap ng bansa sa mga salang
panunuhol, pangungurakot at mga katiwalian, pagtataksil sa tiwala
ng publiko, at sadyang paglabag sa Saligang Batas. Ang isang pirasong
ebidensiyang makatutulong sana sa makatarungang paghatol sa sakdal
na ibinunga ng sama-samang pagkilos ng mga mamamayan, ng kanilang
mga organisasyon, at ng kanilang mga kaalyado ay tinangkang hadlangan
ng labing-isa sa dalawampu't isang Senador na noo'y naghuhukom doon.
Sa isang biglang igpaw ng ngitngit ay sama-samang nagtungo ang mga
mamamayan sa makasaysayang lansangang ang pangala'y EDSA, at sa loob
ng sumunod na apat na araw ay ipinahayag nila ang kanilang pagtutol
sa patuloy na paghahari ng kaimbihan sa bansa, hanggang sa noong katanghalian
ng Enero 20, lumulan ang isang luhaang Estrada sa isang bangkang palayo
sa Malacañang at pauwi sa kanyang sinilangang bayang San Juan.
Enero 22, 1987 nang maganap ang Masaker sa Mendiola. Noo'y hindi
pa nakararating sa una nitong kaarawan ang pamahalaan ni Corazon "Cory
Cojuangco-Aquino, na sa marami sa ating mga aklat-aralin ay ipinagbubunyi
bilang isang dakilang lider na muling bumuhay sa demokrasyang inutas
ng batas militar. Daan-daang magsasaka ang noo'y namamahayag sa harapan
ng Malacañang upang hingin ang matagal na nilang ipinananawagang
tunay na repormang agraryo—isang repormang agraryong maglalagay
ng kapalaran ng magbubukid sa sarili niyang kamay at hindi magbabago
lamang sa bihis ng kanyang pagkaalipin. Tumanggap ng tugon ang kahingian
nilang ito, ngunit hindi pagsasakatuparan kundi mga punlo mula sa
mga baril ng mga pulis at militar na nakaharang. Marami ang namatay
at nasugatan sa masaker na itong hanggang ngayo'y di pa napananagutan
ng mga dapat managot.
Enero 26, 1970 nang sumiklab ang FQS. Ang mga kabataan at estudyanteng
may ilang taon nang kumukundena sa pamahalaang Marcos dahil sa pangangayupapa
nito sa mga interes ng imperyalismong Estados Unidos at di nito pagbuwag
sa kaayusang kinatatampukan ng malawak na inhustisyang panlipunan
at walang habas na katiwalian sa pamahalaan ngunit di naman dinirinig
ng mga nasa kapangyarihan ay lumusob sa Mendiola at nagtangkang buwagin
ang tarangkahan ng Malacañang. Pagsiklab ito ng natipong matwid
na pagkasuklam ng mga kabataan sa kahambal-hambal na kapalaran ng
bayan. Subalit sa halip na ugatin ang pinagmulan ng dahas ng mga kabataang
iyo'y gumanti ng dahas ang estado, at marami sa kanila ang pinigtalan
ng buhay at di rin mabilang ang mga pinutukan ng ulo at mukha at binalian
ng buto.
Makasaysayan ang lahat ng sigwang itong pawang naganap sa buwan ng
Enero. Makasaysayan ang pag-aalsang People Power 2 sapagkat naipakita
nito ang laki ng maaaring gawin ng isang bayang nagkakaisa. Makasaysayan
ang Masaker sa Mendiola sapagkat naipakita nitong ang demokrasya ay
di dapat natin makakamit kung iaasa lamang sa mga katauhan kagaya
ng ginawa ng marami sa atin matapos na maluklok si Cory Aquino. Makasaysayan
ang FQS ng 1970 sapagkat bagama't di nagtagumpay ang mga lumusob sa
Mendiola sa litaw na hangaring patalsikin ang pamahalaang Marcos ay
napukaw naman nila ang madlang nasanay na tingnan ang kabataan bilang
mga taong nasa yugtong ang tao'y nag-aaliw sa kalagitnaan ng kawalan
ng alalahaning mabibigat at pagtuklas sa mundo sa labas ng kamusmusan,
at nagbunsod ng malalimang pagsusuri sa lahat ng dako at nagpatanto
sa maraming kung ang kabataang dapat ay nagsasaya lamang ay maramihang
nagbubuwis ng buhay alang-alang sa bayan ay kahambal-hambal nang talaga
ang kalagayan ng bayan at nangangailangan na itong sa wika ni Gat.
Andres Bonifacio ay "tapunan ng lingap" ng lahat.
Sapagkat makasaysayan ang ikalawang hati ng Enero sa ating kalendaryo,
panahon ito upang isagawa ang malalim na pagbabalik-tanaw sa ating
nakaraan. Sa ating kasaysaya'y makikitang itong bayan nating mahilig
na magtampisaw sa malalim na imburnal ng kawalang-luwalhati ay may
napakalaking kakayahan ding gumawa ng kadakilaan.
Alexander Martin Remollino
Kapatnugot, Tinig.com
---------------
