| Alipato |
 |
| Alexander
Martin Remollino |
ISA SA mga dahilan ng pagkakaluklok ng pamahalaang Macapagal-Arroyo
ay ang naging malawakang pagkapoot ng mga mamamayan sa mga kabulaanang
pinalaganap ng naunang nagsipamahala, na diumano'y makamasa ngunit
iilan lamang na malalaking negosyante ang dinulutan ng kapakinabangan.
Samakatwid, isa sa mga inasahan ng milyun-milyong mamamayang nagtungo
sa EDSA noong Enero 2001 ay ang maging matapat ang pamahalaang ito.
Kamakaila'y naging mainit na usapin sa ating bansa ang tungkol sa
paglulunsad ng mapagpangunang pagsalakay sa mga bansang pinaghihinalaang
nagbabalak na magsagawa ng mga hakbanging terorista. Ang Australya,
matapos na ang embahada nito sa ating bansa ay makatanggap ng banta
ng pambobomba mula sa pinaghihinalaang mga terorista, ay nagmungkahing
payagan itong maglunsad ng mapagpangunang mga pagsalakay sa mga teroristang
bansa sa Asya. "Sadyang matwid na kung naniniwala kang may sasalakay
sa iyong bansa, sa kumbensiyunal mang paraan o sa kaparaanan ng terorista,
at may kakayahan kang pigilin iyon at wala nang mapipili pa liban
sa kakayahang iyon, di kasi'y kakailanganin mong gamitin iyon,"
ani John Howard, Punong Ministro ng Australya.
Sa usaping ito'y nagpamalas ng pambihirang katapatan ang mga opisyal
ng pamahalaang Macapagal-Arroyo—katapatang maliwanag na udyok
ng walang kapantay na kagitingan. Makapangyarihang mga salita ang
pinawalan ng mga bibig ng mga Blas Ople at Roilo Golez. Naging lubos
silang matapat sa pagpapahayag ng pagtutol sa mungkahing ito ng Australya.
Ang pahayag na ito'y "lubhang padalus-dalos, mapusok, at bahagyang
nakasusulukasok," ani Blas Ople, Kalihim ng Ugnayang Panlabas.
Sinabi rin niyang ang alinmang bansang magbanta nang ganito'y siya
na ring nagbubukas ng daan upang ito'y maparatangang may mga hegemonikong
hangarin.
Ayon naman kay Roilo Golez, Tagapayo ukol sa Pambansang Seguridad,
"palalo" ang ganitong pagpapahayag.
Matitindi ang mga salitang pinagbibitiwan nina Ople at Golez laban
sa talaga namang aroganteng mga kapahayagan ni Howard. Ipinahihiwatig
nga naman ng mga pahayag ni Howard na sa sandaling akalain ng Australya
na ang alinmang bansa ay nagbabalak na salakayin ito ay may karapatan
na itong magsagawa ng pagsalakay sa naturang bansa—kahit na
maaaring ito'y isang maling pag-aakala. Hindi nagustuhan nina Ople
at Golez ang ganitong pangangatwiran—at naging matapat sila
sa pagpapahayag ng saloobin nila sa bagay na ito. Kung dito at dito
rin lamang ay naging lubhang matapat sina Ople at Golez--at dapat
silang ipagpatayo ng bantayog, lalo pa't ang katapatan, sabi nga sa
isang sikat na kanta ni Billy Joel, "ay salitang nag-iisa lamang."
Subalit kung ang mga pahayag nila laban sa mungkahi ni Howard ay
itatapat sa nauna nilang mga pahayag, ang naghahanap ng katapatan
ay walang matatagpuan—wala, liban sa nag-iisa niyang sarili.
Sa mga pahayag nina Ople at Golez laban sa pinagsasabi ni Howard,
maliwanag pa sa sikat ng sanlaksa nitong ating araw ang pagpapahiwatig
ng mariing pagtutol sa makaisang-panig na hakbangin. Datapwat matatandaang
kamakaila'y nagpanukala rin ang Estados Unidos na ito'y magsasagawa
ng hakbanging makaisang-panig laban sa Iraq—diumano'y dahil
sa pagiging banta ng bansang nasabi sa kapayapaang pandaigdig—at
habang dinuduro si Dubya Bush ng halos buong mundo dahil sa mayabang
na kapahayagang ito, sina Ople at Golez ay nakiisa sa pagpapahayag
ng Kagalang-galang na Pangulong Gloria Macapagal-Arroyo ng pagtangkilik
sa napipintong digmaan.
Sa Kagawaran ng Ugnayang Panlabas, ang nakapagbigay na ng pinakamatapat
na kapahayagan hinggil sa mungkahi ng Australya ay si Lauro Baja,
Katulong na Kalihim. "Ang Australya ay hindi ang Estados Unidos,"
ani Baja. "May mga higit na mabisa at mapagmalasakit pang hakbang
upang labanan ang terorismo, at ang makaisang-panig na pagkilos ay
hindi kabilang sa mga ito."
Kung sina Ople at Golez ay nararapat na ipagpatayo ng bantayog dahil
sa kanilang katapatan sa pagtutol sa kapahayagan ni Howard, si Baja
nama'y dapat na ipagpatayo ng bantayog na lalong malaki pa sa papagsasamahing
magiging mga bantayog nina Ople at Golez. Dahil sa labis niyang katapatan
ay naipagtapat niya—aywan kung sadya o di-sadya—ang tunay
na saloobin ng pamahalaan sa usapin ng pagsasagawa ng aksiyong makaisang-panig.
Naipagtapat niya, aywan kung sadya o di-sadya, na sa pananaw ng pamahalaang
Macapagal-Arroyo, walang bansa ang may karapatang maglunsad ng mapagpangunang
pagsalakay—wala, liban sa Estados Unidos. Naipagtapat niyang
sa pananaw ng pamahalaang Macapagal-Arroyo, ang mapagpangunang pagsalakay
ay matwid kung ang gagawa ay ang Estados Unidos, ngunit kung ibang
bansa liban sa Estados Unidos ang gagawa ay isang kasalarinang walang
kapantay kahit na papagsama-samahin pa ang lahat ng kasalanang napaggagawa
na at paggagagawin pa ni Satanas.
Isang mahalagang aral ang matututunan sa lahat nitong mga pangyayari—mabisang
paraan ng paghahanap ng katapatan ang pagtatapat-tapat ng mga pahayag
---------------
Si Alex, isinilang noong Agosto 1977, Kapatnugot ng Tinig.com, ay
manunulat sa Bulatlat.com at sa BNext. Sangkot siya sa mga kampanyang
panlipunan at pampulitika, sa lansangan man o sa Internet.
