Ang mga telenobela ay may layunin daw na bigyan ng pag-asa ang mga kapos-palad na manonood, o di kaya'y mga taong nawawalan na ng kakayahang mabuhay.

Saan kaya nagsimula ang telenobela? May mga nagsasabing ito'y nagsimula sa Mara Clara, Valiente, at Marimar. Subalit sa aking palagay, ito'y nagsimula sa mga pulitiko.

Tuwi kasing papalapit ang eleksiyon ay saka naglalabasan ang "malulungkot" na istorya ng buhay nitong mga pulitiko. Talagang tulung-tulo ang mga luha, uhog, at laway nila kung inilalahad ang kani-kanilang mga kuwento.

Tingnan natin ang mga ikinukuwento ng ibang mga pulitiko. May nagsasabing sila raw ay dating magsasaka, samantalang ang totoo'y sila ang "nagpapasaka". Ang sabi naman ng isa ay dati siyang shoe shine boy, at may naglahad na siya raw ay isang anak sa labas. Hindi ba't katulad din ng mga nasa telenobela? Pare-pareho silang nagsasabing nagsimula sila bilang mga hampas-lupa at biglang naging mayayaman. "Mula sa pagkabaon ay bumangon ako bilang isang bagong nilalang," tila nais nilang sabihin.

Sa telenobela ay uso ang walang pusong mga kontrabidang pumapatay ng mga tao, at sa pulitika naman ay uso ang patayan; parang matira-ang-matibay kapag nagaganap na ang eleksiyon.

Uso rin sa telenobela ang pagnanakaw ng kontrabida at pambibintang nitto sa bida. Ganito rin ang nangyayari kapag may nananakawan ng balota, kung sinu-sino ang nagtuturuan.

Paminsan-minsan—lalo na sa mga telenobela ng ibang bansa—ay may isang seksing babaeng nagbabawas ng kanyang saplot sa katawan upang maragdagan ang nakikita ng mga manonood sa maganda niyang hubog. Nangyayari rin ito sa pulitika; hindi ba't talamak ang dagdag-bawas sa eleksiyon?

Ngunit mayroon din palang ipinagkakaiba ang pulitika at ang telenobela, at ito'y nangyayari lamang kapag nagkakaroon ng blackout. Kapag may nanonood ng telenobela at biglang nag-blackout, inis na inis siya, pinagsasasabunutan ang sarili at mukhang puputok pa ang mga ugat niya sa ulo. Kapag may nagaganap na eleksiyon at biglang nag-blackout, tuwang-tuwa naman ang mga pulitiko dahil madali na nilang maisasagawa ang maiitim nilang balak. Hindi na nila mapigilan ang papagkiskisin ang mga kamay at maglabas ng ngiting kasinlaki ng pagitan ng mga Galaksiyang Milky Way at Andromeda.

Tingnan mo nga naman talaga ang mga telenobela at ang pulitika. Kung puro telenobela na lang ang makikita saanman tumingin, ano na kaya ang mangyayari sa atin?

For comments and reactions to this article, please visit Tinig.com Forums.