Alipato
Alexander Martin Remollino

KARANIWAN NA natin silang masalubong sa mga lansangan—at may mga nagsasabing habang lumilipas ang panaho'y lalo silang nagiging karaniwan. Iba't iba ang kanilang anyo: ang iba'y taong-grasa, ang iba'y tila hindi naman naiiba sa atin sa bihis, bagama't sa hitsura'y mapaghahalatang may katagalan nang di nahahagkan ng tubig ang katawan. Sila'y itinatangi ng kanilang mga kakaibang gawi. May ilan sa kanilang makikita nating tawa nang tawa nang nag-iisa kahit na wala naman tayong makitang anumang sukat nilang pagtawanan. May ilan diyang sasayaw-sayaw nang halos walang suot sa gitna ng lansangan.

Sila ang mga baliw. Di lang sa mga lansangan sila natatagpuan; marami pang katulad nila sa mga pagamutan.

Karaniwan na rin nating pagtawanan ang mga tulad nila. Subalit sino ba sila at ano ang ipinag-iba natin sa kanila?

Sa mga diksiyunaryo, sinasabing ang baliw ay yaong wala sa matinong pag-iisip, yaong walang kakayahang gumawa ng makatwirang paglilimi.

Karaniwang itinuturong sanhi ng kabaliwan ang mga karanasang lubhang hindi katanggap-tanggap. Ayon sa mga sikologo at sikiyatriko, karaniwan nang kapag ang tao'y dumanas ng ganito ay ang kanyang isip na mismo ang gumagawa ng paraan upang ilayo ang kanyang kamalayan sa mapait na katotohanan.

Datapwat may isang uri ng kabaliwang higit na laganap bagama't di pa napagtutuunan ng pansin ng mga dalubhasa sa sikolohiya at sikiyatriya. Ito'y ang kabaliwang likha ng katamarang magbukas ng isip upang umunawa.

Ang mismong pagtatawa natin sa tuwing tayo'y makakikita ng karaniwang baliw ay isang tanda ng kabaliwan. Hindi ba't ang matinong pag-iisip ay uunawa sa kanila sa halip na sila'y pagtawanan pagkat ganap na nakagagagap na hindi nila buong kasalanan ang kanilang pagkakagayon?

Bukod pa rito'y maraming iba pang uring kabaliwan tayong ginagawa na hindi natin napapansin. Dahil dito'y maitatanong natin kung sino ang higit na baliw—tayong diumano'y may matinong pag-iisip o silang ang isip ay tinakasan ng katinuan.

Tayong mga nagpapabayang pagpasasaan ng mga dayong huwad na tagapagligtas ang ating bayan—hindi kaya tayo'y higit pang baliw sa mga nagtatatawa kahit na walang nakatatawa at sa mga nagsasasayaw nang halos walang suot sa gitna ng lansangan?

Tayong mga nagbabaling ng ating mga ulo sa ibang direksiyon sa tuwing makikita ang kalagayan ng marami nating kababayang binubusabos ng iilan—hindi kaya tayo'y higit pang baliw sa mga nagtatatawa kahit na walang nakatatawa at sa mga nagsasasayaw nang halos walang suot sa gitna ng lansangan?

Tayong mga naghahalal ng mga pinunong walang galang sa atin at handang ipagbili maging ang mga bangkay ng ating mga ninuno at ang mga anak nating hindi pa isinisilang—hindi kaya tayo'y higit pang baliw sa mga nagtatatawa kahit na walang nakatatawa at sa mga nagsasasayaw nang halos walang suot sa gitna ng lansangan?

Sino ang lalong baliw? Sino ang lalong malayo sa katwiran?

For comments and reactions to this article, please visit Tinig.com Forums.