TULA
Para Sa 'Yo
Ni Renalyn Dimayacyac

Una kitang nakita, parang di ka man lang tumagal sa isip ko
Matapos ang isa't kalahating oras ay di ko na alam ang pangalan mo
Sino ka bang kailangang alalahanin at bigyang-pansin
Tulad ka din ng ibang kakilala, ordinaryong estudyante, kapalitan ng tingin

Lumipas ang mga araw, nadagdagan ng ilang oras ang presensya mo sa utak ko
Napansin kong may kakaiba kang ngiti, maganda ang iyong mukha at maraming talento
Oo, humahanga na ako sayo, pero hanggang doon pa lang
Ni hindi ko napansin na habang tumatagal ay lumalala na pala itong dati'y paghanga lang

Ngayon, tapos na ang klase at ang pagkakataon na makita at makausap ka
Malungkot, oo, pero ganon talaga ang buhay kahit pigilan mo pa
Minsan may mga bagay na dumadating ngunit di mo kayang angkinin
Minsan may mga katotohanang masakit man ay kailangan mong tanggapin

For comments and reactions to this article, please visit Tinig.com Forums.