MULA SA PATNUGOT
Kabataan Laban sa Agresyon at Digmaan

SA MGA sandaling binabasa mo ang ika-22 labas ng Tinig.com, patuloy na nagbabanta ang digmaan. Sa isang iglap, maaaring gambalain ng karahasan ang anumang natitirang kapayapaan sa buong mundo.

Dahil sa marubdob na pagnanais ng United States na makontrol ang mayamang langis sa Iraq, pinararatangan at pinagbabantaan ng una ang huli. Mayroon daw weapons of mass destruction ang Iraq. Pilit na humahanap ng butas ang US upang mabigyang-katuwiran ang binabalak na pag-atake sa Iraq. Bahagi raw ito ng kampanya laban sa terorismo.

Kamakailan ay ipinasa ng United Nations Security Council ang isang resolusyong magpapadala ng grupong mag-i-inspect sa Iraq. Kapag pumalag daw si Saddam, aatake ang US.

Masama na kung masama ang rehimeng umiiral sa Iraq, ngunit daragdagan pa ba natin ito ng lalo pang kasamaang kakalat sa buong mundo?

Naghahamon ng digmaan ang US. At ang ating mahal na pangulo ay nagpahayag ng todong pagsuporta sa mga layunin ng US. Hindi kaya masasangkot tayo sa gulo?

Papayag ka ba? Sana hindi. Sana ang bagong salinlahing Pilipino ay magbuklod upang labanan ang agresyon at digmaan.

Ang digmaan ay nagdadala ng kamatayan.

Katatapos lang ng Araw ng mga Patay. Pati nga ang magaling na kartunistang si Nonoy Marcelo at ang mahusay na basketbolista ng La Salle U na si Migs Gozum ay namatay. Huwag na nating dagdagan pa ng lalo ang mga namamatay.

For comments and reactions to this article, please visit Tinig.com Forums.