PIHADONG NAGLULUKSA ang Dagalandia. Ang makulit at malikot na si Ikabod ay inulila ng kanyang bosing. Ngunit malamang, ang kanilang pagluluksa ay kaiba sa karaniwan.

Sapagkat kahit yata sa kanyang paglisan ay tuwa at aliw ang naghatid kay Severino Santos Marcelo na mas kilala bilang Nonoy Marcelo, kilalang kartunista na lumikha kina Ikabod, Tisoy, at Aling Otik.

Sa burol niya sa Funeraria Floresco sa Malabon, nagsidatingan ang mga kamag-anak, kaibigan, dating kasama sa hanap-buhay, at mga tagahanga. Sa dingding ng silid kung saan siya nakahimlay ay nakahilera ang mga kanyang mga larawan at likha. Nagulat at naaliw ang marami nang malamang noong maliit na bata pa lamang pala ito ay pinagbibihis-babae siya ng kanyang magulang. May isa nga na humirit: "Buti hindi siya naging bading."

Habang nagkukuwentuhan ang mga dumalaw, ang kanyang mga munting apo ay masayang naghahabulan at naghaharutan. Hindi tuloy maiiwasang maalala ang makulit na tropa ni Ikabod.

Sa gitna ng dilim ng Batas Militar na lumukob sa sambayanan noong panahon ng diktadura, tila liwanag na tanglaw ang nakatatawang mga hirit ni Nonoy Marcelo sa kanyang mga cartoon, wika ng dating aktibistang pari na nagmisa nang gabing iyon.

Kahit nang muling manumbalik ang demokrasya sa bansa, patuloy tayong kiniliti ng kanyang sining. Naging kartunista siya sa i magazine ng Philippine Center for Investigative Journalism, sa Philippine Journalism Review ng Center for Media Freedom and Responsibility, at sa Pinoy Times ng batikang peryodistang si Eugenia Apostol. Muli rin niyang inilathala ang Ikabod Komiks.

Bago pumanaw, si Nonoy Marcelo ay editor ng PTYK magazine ng Manila Times kung saan tila sinadya ng pagkakataong ang pinakahuli niyang tinampok ay si Tony Velasquez, Ama ng Komiks at lumikha kay Kenkoy.

Siguro, ngayo'y dumalaw na rin si Kenkoy sa Dagalandia upang makipagkulitan kay Ikabod.

.

For comments and reactions to this article, please visit Tinig.com Forums.