ISA NA namang matipunong haligi ng sining sa Pilipinas ang binawian ng buhay.

Sadyang kaylupit ng taong ito sa mga alagad ng sining sa ating bayan. Magkakasunod kung sila'y kunin ni Malakalmut/Kamatayan. Nauna na noong Mahal na Araw ang mga kompositor na magkaibigan sa matagal na panahong sina Maestro Lucio San Pedro at Mang Levi Celerio. Sumunod noong Abril 5 ang pinaslang na batang-batang si Beng Hernandez, na bukod sa pagiging aktibista para sa karapatang pantao'y isa ring makata—at kinilala ng maraming manunulat sa Davao City bilang isa sa pinakamagagaling na kabataang manunulat ng kanilang lunsod. Noong dakong dulo ng Hunyo'y lumisan upang di na magbalik pa ang kartunistang si Larry Alcala. Nito namang Agosto'y iniwan tayo ng manunulat na si Franz Arcellana. At ngayon nga'y sumunod na sa kanila upang di na natin kailanman makapiling si Nonoy Marcelo.

Sa Far Eastern University unang napabantog ang mga komik istrip ni Nonoy Marcelo. Naging kartunista siya ng Advocate, ang pahayagan ng mga mag-aaral sa naturang pamantasan.

Noong dekada 1970, si Marcelo'y naging direktor ng ilang "dokumentaryong" pinasimunuan ni Imee Marcos.

Ngunit nang lumao'y nakita niya ang nakapandidiring pagmumukha ng batas militar, at siya'y naging isa sa pinakamahihigpit na kritiko ng mga Marcos. Sa pamamagitan ng kanyang komik istrip na "Ikabod" ay isinatira niya ang mga katarantaduhan ng rehimeng Marcos.

Kung saan-saan napadpad ang kartun niyang "Ikabod", at ang pinakahuli ngang kinalagyan nito'y ang nagpinid nang Pinoy Times, kung saan siya naging art director.

Bukod sa "Ikabod", na nanalo sa Catholic Mass Media Awards noong 1985, nakilala rin siya sa paggawa ng iba pang komik istrip—ang "Plain Folks", "Tisoy"; at ang pinakahuli'y ang "Ptyk", na kanyang ginawa para sa Manila Times.

Bukod pa rito'y manaka-naka siyang sumulat ng mga katatawanan, lalo na'y mga katatawanang may panama sa mga namamahala sa bansa, halimbawa'y sa okasyunal na pitak na "Ni Ha Ni Ho" sa Manila Chronicle.

Si Nonoy Marcelo ay isang tunay na alagad ng Pilipinong sining. Sa mga likha niya'y makikita natin ang ating mga sarili at ang ating katawa-tawang pamumuhay.

Malaking kawalan ang kanyang pagpanaw.

For comments and reactions to this article, please visit Tinig.com Forums.