TULA
Panunuod ng Sine
Ni Mark Angeles

Isang ritwal ng pagsasanib
Ang panunuod ng sine

Mga kaluluwa tayong ligaw
Na nagbubungkal
Ng tamis at alat ng gunita

Sa bawat pagbibitiw ng linya
Talambuhay nating binubuklat
Ang sipat ng istorya

Habang nakaupo sa dilim
Nilululon ang ating imahinasyon
Minamaso ang dibdib
Tila panginoong nag-aatas
Sa atin, tayo'y pinapatahimik

Ngunit hindi matatahimik ang loob
Lalo pa't pinipiga tayo para
Matakot, matawa, malungkot

Kung ganito lang ang buhay
At di kailangang magpasiya
Ang mundo'y umiikid sa mababait
Na mga hari't reyna
At ang mga manggagawa't
Magsasaka ay mga timawa.

--------------
Si Mark ay Vice President for Luzon ng College Editors Guild of the Philippines.

For comments and reactions to this article, please visit Tinig.com Forums.