Pandaigdigang Pulong sa Pagsasaka, Tinuligsa ng mga Samahan
Ni Dennis Espada, BALIKAS

LOS BAÑOS, Laguna—Tinuligsa kamakailan ng mga samahang magsasaka at di-pampamahalaan mula sa iba’t ibang bansa ang anila’y kabiguan ng International Rice Research Institute (IRRI) na matugunan ang kahirapan at kagutuman sa mga bansa ng Ikatlong Daigdig.

Idinaos sa IRRI noong Oktubre 29 ang tinaguriang "Araw ng IRRI" na dinaluhan ng mga kinatawan mula sa kasaping-bansa ng Consultative Group on International Agricultural Research (CGIAR) na noo’y nagdaraos ng isang linggong taunang pangkalahatang pulong nito.

Ang CGIAR ay nilikha noong 1971. Layunin nitong gamitin ang agham upang maibsan ang kagutuman at kahirapan, mapaunlad ang nutrisyong pantao at kalusugan at pangalagaan ang likas-yaman.

Ang IRRI, na matatagpuan sa bayang ito, ay kasapi ng CGIAR.

Kontra-Magsasaka, Kontra-Mahirap
Sa isang "Pahayag ng Pagkakaisa" ng People's Street Conference na inilunsad kasabay ng pulong ng CGIAR, binigyang diin nila na mula pa noo'y itinataguyod ng CGIAR at IRRI ang isang "top-down, one-size-fits-all approach sa pananaliksik na nagbabalewala sa kaalaman at karanasan ng mga magsasaka, komunidad at katutubong mamamayan. Idinagdag din nila na ang sistemang itinataguyod ng IRRI ay nakaasa sa sa pestisidyo, abono at iba pang kemikal na mapanira sa yamang-lupa.

Ayon kay Pat Mooney, puno ng Erosion Technology Corporation Group, isang organisasyon sa Canada na nag-aaral ukol sa bagong teknolohiya, "Nandito kami upang ihayag ang aming pangamba sa direksiyong tinatahak ng IRRI at ng CGIAR. Sa palagay namin, ang mga ito’y naglilingkod hindi sa interes ng mga magsasaka kundi para sa mga korporasyong transnasyunal. Ito’y nasa krisis, at kung hindi nila aaminin ito, lalong masasadlak ang mga magsasaka ng daigdig sa kumunoy ng kahirapan at kagutuman."

Inamin ni Mooney na matagal na nilang sinusubaybayan ang mga gawain ng CGIAR. At sa kabila ng imbitasyon sa kanya na lumahok sa pulong nito, mas pinili niyang makiisa sa mga magsasaka upang talakayin ang kanilang alternatibong programa.

'Di kami dapat sisihin'
"Hindi kami ang dapat nilang sisihin."

Ito naman ang pagtatanggol ni Duncan Macintosh, pinuno ng Visitors and Information Services ng IRRI hinggil sa mga akusasyon ng mga bumubuo ng People’s Street Conference. Ayon kay Macintosh, hindi umano makatarungan na sisihin ang isang institusyong gaya ng IRRI sa lahat ng suliranin ng mga magsasaka.

"Hindi maipagkakaila na sa lahat ng dako, ang mga magsasaka ay naghihirap at nagsisikap upang magkaroon ng hanap-buhay. Subalit makikita rin naman na may mga bansa tulad ng Thailand, Vietnam, India at China na nating matagumpay sa pag-aangkop nila ng mga bagong teknolohiya mula sa IRRI upang mapabuti ang kalagayan ng kanilang mga magsasaka. Ginawa rin ito sa Pilipinas nguni’t bunga ng maraming kadahilanan, ang mabuting epekto nito ay hindi naging kasing tindi ng nangyari sa ibang bansa," paliwanag ni Macintosh sa wikang Ingles.

Mariin niyang itinanggi na itinataguyod ng IRRI ang paggamit ng pestisidyo at kemikal sa kanilang pagpapaunlad ng binhi. "IRRI's research for many years has been about getting farmers to reduce their pesticide use. The institute has never promoted pesticide use among farmers, and we would challenge those who claim this to produce evidence to back up their claims. Even more important are the many rice varieties developed by IRRI that are resistant to diseases and insects and so require less pesticide," paliwanag niya.

Ayon kay Macintosh, ilang ulit na nilang iniimbitahan ang Kilusang Magbubukid ng Pilipinas (KMP) at ang Peasants and Scientists’ Partnership for Development of Agriculture (MASIPAG), dalawa sa mga pangkat na nakikiisa sa People’s Street Conference, na bumisita sa IRRI upang makita kung gaano kakumplikado at kadetalyado ang pag-aaral ng mga dalub-agham sa IRRI.

"For many years, we have not focused only on yield increases but also the profitability of rice farming. But most important of all, IRRI consults directly with farmers far more than it ever did. In the Philippines alone, IRRI has at least three important projects directly involving farmers in Quezon, Iloilo and Mindanao."

Nanawagan si Macintosh sa mga nagpoprotesta na makipagtulungan sa IRRI upang makinabang ang mga magsasaka. "We have asked them many times to visit IRRI but they have always refused. That probably explains why they do not see any change because they have not taken time to look…If they’re sincerely concerned about farmer interests, why did they not show up at the dialogue between farmers and the CGIAR?"

NGOC sa CGIAR
Samantala, napag-alaman ng Balikas na ang Non-Government Organizations Committee (NGOC) ng CGIAR ay lumabas sa harap ng Shangri-la Hotel sa lunsod ng Makati kung saan ginanap ang ikatlong araw ng pulong noong ika-30 ng Oktubre 30 upang makipagdayalogo sa mga kinatawan ng People’s Street Conference.

Matapos ang pakikipagdayalogo, nagbigay ng pampublikong pahayag si Patrick Mulvany ng ITDG-United Kingdom at kasapi ng NGOC. Ayon kay Mulvany, "CGIAR is deviating from its mandate and is adopting a corporate agenda for agricultural research and development. CGIAR’s consideration of Syngenta Foundation’s membership (isang korporasyong agro-kemikal) is a clear indication of the trend towards the corporatization of public agricultural research. Furthermore, the quest for partnerships with the private sector undermines the public role of CGIAR."

May ilan pang obserbasyon ang NGOC sa CGIAR. Ayon sa NGOC, nabigo ang CGIAR na suportahan ang kagyat na moratoryum hinggil sa paglalabas ng mga halamang may pinakialamang himaymay-buhay (GMO crops) sa kabila ng kontaminasyon ng GMO sa Mehiko at ang potensyal na kontaminasyon sa iba pang sentro sa mga susunod na taon.

Nabigo rin anila ang CGIAR na itaguyod ang prinsipyo na ang germplasm ay pampublikong pag-aari at labanan ang banta ng monopolisasyon ng himaymay-buhay (genes) sa pamamagitan ng Intellectual Property Rights. Ang prinsipyong ito ay nakatakda sa Trust Agreement sa pagitan ng Food and Agriculture Organization (FAO) at CGIAR. Ang germplasm ay ang pinagmumulan ng mga selula. May iniipong ganito sa mga imbakan ng himaymay-buhay o gene banks ng CGIAR.

Ikatlo, aktibo rin daw na isinusulong ng CGIAR ang produkto at teknolohiya ng genetic engineering o biotechnology na hindi naaayon sa makamagsasakang pananaliksik na agro-ekolohikal.

Ipinaliwanag ni Mulvany na kailangang isulong ang sistema ng pananaliksik na pinangungunahan ng magsasaka at pangalagaan ang genetic resources sa mga gene banks ng CGIAR. Ayon sa kanya, dapat bigyang-tuon ito ng CGIAR. "Nakakalungkot na karamihan ng mga programa ngayon ay hindi nakaayon sa mga prayoridad na ito," sabi ni Mulvany sa Ingles.

For comments and reactions to this article, please visit Tinig.com Forums.