MAIKLING KUWENTO
Mad Dino
Ni Chuckberry J. Pascual

Secret
"Things haven't been the same
Since you came into my life"

"MANGGAGAYA," SABI ni Madonna habang tinatapakan ang may sindi pang stick ng Philip Morris. "Saan mo ba nabili tong sigarilyong to? Hindi masarap. Lasang karton."

"Dyan sa labas. Yan ang brand ko, e. At least, kapag nandito sa bahay. Kapag nasa labas, Winston Lights," sagot ko. Pinagmasdan ko munang pitikin ni Madonna ang napitpit na sigarilyo sa suwelas ng Versace niyang stiletto bago ako nagsalita ulit.

"Anong ginaya sa iyo ni Kylie?"

"Reinvention. Nung nalaos siya, nagpalit din ng image. Saka kahit dati pa, ginagaya na ako niyan." Masarap sigurong magyabang kung naka-Versace at Dolce and Gabbana ka. Samahan mo pa ng Bulgari na bracelet. At Tuberose na pabango.

"Yun lang? Lahat naman ng nalalaos, nagme-make over ng career nila."
"Hindi, a. Bakit si Michael Jackson?"

Natawa ako. "Sabagay."

"Next?"

Tumatawa pa rin ako nang tingnan ko ang susunod na pangalan sa listahan ko ng mga bibilhing CD's: Cher. Nahulaan ko na kung ano ang sasabihin ng idol ko pero binasa ko pa rin ng malakas ang pangalan ng dating asawa ni Sonny Bono.

Kumunot ang ilong ni Madonna. "Baduy."

Gusto ko si Cher; nanalo na siya ng Oscar bilang Best Actress at humigit-kumulang apat na dekada na siyang kumakanta. Isa pa, isa sa mga paborito kong kanta ang "Believe". Sinabi ko ito kay Madonna.

"Narinig mo na ba ang 'Gypsies, Tramps, and Thieves'? Alam kong narinig mo na ang 'I Got You Babe', pero alam mo bang sila ni Sonny ang kumanta non?"

Nainis na rin ako nang bahagya. Wala pa siyang nagugustuhan sa mga binabanggit ko. Pangit na ideya yatang ipagpaalam ko pa kung sino ang mga gusto kong pakinggan. E parang ang gusto niya, puro album lang niya ang pakinggan ko.

Oo, idol ko si Madonna. Pero siya na rin ang nagsabi di ba? "Music makes the people come together, music makes the bourgeoisie and the rebel"? Gusto ko nang i-expand ang musical horizons ko. Sa buong dalawampung taon ng buhay ko, puro siya lang ang pinapakinggan ko.

"Si Bjork?"

"Okay," sabi niya habang nakangiti. Napatingin ako sa uwang sa pagitan ng dalawang pangharap na ipin niya. Naalala ko yung mga panahong pilit kong isinisingit ang ATM card ng lola ko sa gitna ng ipin ko sa harap para magka-uwang din ako sa ipin. Walang nangyari; nagalit lang ang lola ko dahil nakubikong yung gilid ng ATM card niya at dumugo ang gilagid ko. One point si Bjork. Pero gusto kong malaman. "Bakit?"

"Visionary siya. Weirdo. Next?"

"Weirdo pero gusto mo?"

"Bakit hindi? Next?"

May ilang banda sa listahan ko pero una kong binanggit ang pinaka-weird sa tingin ko.

"Radiohead."

Nag-isip sandali si Madonna.

"Well?" sabi ko. Mapapasubo siya ngayon.

"Maganda ang 'OK Computer'. Pero hindi ko pa naririnig ang 'Kid A'."

Shocked ako. Nakikinig pala sa rock music ang idol ko. "Bakit hindi pa?"

"Parang 'Emperor's New Clothes' yon , e. Kapag pa-intellectual ka, gugustuhin mo; kapag nagpakatotoo ka, malamang ayawan mo. Pero hindi ka matatawag na intellectual."

"Ayaw mo palang malaman kung intellectual ka o hindi."

"Ikaw, gusto mo?"

Ako naman ang napaisip. "Pero cute naman si Thom Yorke, di ba?"

"So-so."

"Mas cute siya kay Dennis Rodman."

Inirapan muna niya ako bago siya pumasok sa aparador, tumalungko sa ibabaw ng mga damit na nakatupi at naglaho sa pagitan ng mga damit na nakasabit sa hanger.

Impressive Instant
"I'm in a trance and the world is spinning
Spinning baby, out of control"

Lunes non ng umaga; namimili ako ng damit na isusuot para sa eskuwelahan. Nagmamadali ako dahil alas-otso ang klase ko pero alas-siyete na, kaliligo ko pa lang. Pagbukas ko ng aparador, napasigaw ako.
May babaeng nakatalungko sa loob. Nakayuko siya kaya ang itim na roots ng blonde niyang buhok ang bumungad sa akin. Hindi ko alam kung alin ang dahilan, ang pagsigaw ko o ang pagpasok ng liwanag sa aparador, pero itinaas ng babae ang mukha niya.

Akala ko dati, umaarte lang yung mga taong napapaurong kapag nagugulat. Pero napaurong ako at napaupo sa kama nang makita kong lumabas si Madonna mula sa aparador ko. Puting sandong hapit sa katawan at maong na may beads na nakakorteng sunflower sa kaliwang hita ang suot niya. Tinititigan ko pa ang mga marka ng stiletto niya sa mga damit kong nasa loob nang marinig ko siyang magsalita: "Ang ganda ng sounds mo, a."

"Impressive Instant" ang pinapakinggan ko non, paborito kong kanta sa "Music". Pero sa halip na magpasalamat, napabulalas ako: "Madonna?"

"Yes?" sabi niya at saka itinaas ang kaliwang kilay. Naalala ko yung pictorial niya para sa Spin magazine. Naka-beret siya at leather na bustier; nakahalukipkip, may kagat na tabako at nakataas ang kaliwang kilay sa kamera. Parang naghahamon.

"Bakit -" hindi ako makapag-isip. Kinuha ko ang remote control ng CD player at hininaan ko ang tugtog. Pinagmasdan ko siya. Nakatayo lang siya at tinitingnan din ako. Hindi siya nakatiis.

"May pasok ka?"

"Kung ikaw si Madonna -"

"Male-late ka na ata," nakangiti siya. Sumisigaw na ang lola ko mula sa baba ng bahay.

"- bakit marunong kang mag-tagalog?"

Tumabi siya sa akin sa gilid ng kama, nag-alis ng sapatos at saka humiga. "Lumabas nga ako sa aparador mo, di ba?"

Nakangiti akong lumabas ng bahay nung araw na yon.

Oh Father
"Oh father, you never wanted to leave that way
You never wanted to hurt me
Why am I running away?"

"Hindi naman ako galit sa kanya." Nakadapa ako sa kama at naninigarilyo; nasa sahig ang basurahan na ginagamit kong ashtray.

"May dahilan ba para magalit ka?" Nasa paanan ko si Madonna, naglalaro ng snake sa cell phone ko. Nakadikuwatro siya; may nakadikit pang Philip sa suwelas ng Prada mary janes niya. Natutunan na rin niyang mahalin ang haba at sarap ng Philip Morris.

"Ayaw niyang uminom ako, pero siya, lasenggo. Ayaw niyang manigarilyo ako, pero siya mismo, naninigarilyo," pinatay ko ang sigarilyo sa pisngi ng sahig. Nadagdagan ang peklat ng sahig ng kuwarto ko.

Puro na marka ng sigarilyo ang sahig ng kuwarto ko. Simula nang pabayaan kong patayin ni Madonna sa sahig ng kuwarto ko ang unang Philip niya, hindi ko na inalintana kahit na anong pagalit ng tatay ko sa tuwing nakikita niya ang mga itim na marka sa sahig. "Kamukha mo na tong sahig mo," sabi minsan ng tatay ko.

Pumalatak muna si Madonna bago nagsalita. Hindi pa rin niya natatalo ang top score ko. "Ano bang yosi niya?"

"Philip din."

Tumawa siya. "Kaya naman pala e."

"Nagagalit siya sa akin sa tuwing tumatawag ang nanay ko. Siyempre kakausapin ko yon."

"Siyempre. Mahal ang overseas call."

"Mahal ko rin ang nanay ko."

"E ang tatay mo?"

"Mahal ko rin."

"Hindi; kinakausap mo ba?"

"Oo. Kapag nangangatwiran ako."

Hindi mapatawad ng tatay ko na napatawad ko ang nanay ko nang iwan niya kami. Umalis ang nanay ko dahil ayaw niyang makisama sa mga biyenan niya. Masyado raw pakialamera ang lola ko. Ilang beses niyang pinilit ang tatay kong bumukod ng tirahan pero walang nangyari. Nag-iisang anak lang kasi ang tatay. Ayaw payagang bumukod kahit nakapag-asawa na. Sabi ng lola ko, wala naman daw masama doon. Ang masama, kung sa bahay ng mga magulang ng nanay ko nakatira silang mag-asawa.

Mula nang iwan kami ng nanay, naging lasenggo na ang tatay ko. Sinunog niya lahat ng bagay na nakakapagpaalala sa dating asawa niya. Minsan nga, pakiramdam ko parang gusto niya na rin akong buhusan ng gaas sa tuwing nakikita niyang may kausap ako sa telepono.

Promise To Try
"Little girl, don't you forget her eyes
Kep them alive inside
I promise to try - but it's not the same"

"Buti hindi ka galit sa lola mo," sabi minsan ni Madonna habang nagpe-Play Station kami. Pinadalhan agad ako ng nanay ko ng Play Station nung sabihin kong nakikilaro lang ako sa kapitbahay. "Resident Evil" ang paborito naming laro ni Madonna.

"Siya'ng nagpalaki sa akin, e." Binaril ko sa dibdib yung zombie na lumalapit sa akin.

Domestic helper ang nanay ko sa Hong Kong. Noon. Ngayon, asawa na siya ng Intsik. Malapit na rin daw akong magkaroon ng kapatid na Intsik, sabi niya sa akin nung huli kaming magkausap.

Maliban sa mga maiikling sulat niya sa tuwing nagpapadala ng pera, telepono lang ang komunikasyon namin ng nanay ko. Mas mamumukhaan ko pa nga siguro ang boses ng nanay ko kaysa aktuwal na mukha niya. Labinglimang taon na kaming hindi nagkikita.

"E sa nanay mo, hindi ka galit?"

Tinadtad ko ng bala yung noo nung isa pang zombie. "Hindi rin."

Human Nature
"You tried to shove me back inside your narrow room
And silence me with bitterness and lies
(Express yourself, don't repress yourself)"

Nagtaka ang lola ko nung pumunta ako sa karinderya namin at nagsabing mag-uuwi ako ng extra serving ng adobo. Sinabi kong may darating kasi akong kaibigan. Lalong siyang nagtaka. Karaniwan na kasing sa karinderya ko pinapakain ang mga bisita ko. Magtatanong pa sana ang lola ko nang biglang sumabad si lolo: "Girlfriend mo?"

Ngiting makahulugan lang ang isinagot ko. Dali-dali akong ipinagbalot ng lola ko ng extra serving ng adobo.

Inakala kong magrereklamo si Madonna dahil masyadong mamantika ang sabaw ng adobo ni Lola. Nagkamali ako. Habang hinihigop ang mamantikang sabaw, nagtanong siya kung ano ang ingredients ng adobo. Magpapaluto daw siya kay Guy.

"Gusto ko rin ng boyfriend na marunong magluto," bulong ko.

"E di paturuan mo sa lola mo," sagot niya habang pinaghihiwalay ang taba at laman ng baboy.

"Ano? Anong sasabihin ko: 'Lola, turuan mo namang magluto ang boyfriend ko?'"

"Aminin mo na kasi," paanas na sagot niya habang kinakawkaw ng daliri ang platitong may patis. "Ano to?"

"Patis. Sawsawan yan." Pinagmasdan ko siyang isubo ang daliri at tikman ang lasa ng mga bulok na isda. Napangiti si Madonna; dagling isinawsaw ulit ang daliring kagagaling lang sa bibig at kinawkaw ang patis na nasa platito. "Magagalit ang lola ko. Nag-iisang apo ng nag-iisang anak na lalaki, bakla? Hindi puwede."

"Sa tatay mo, hindi ka takot?" sabi ni Madonna habang subo ang hintuturo ng kanang kamay.

"Mas takot ako sa lola ko. Tatay ko mismo takot sa lola ko, e."

You Must Love Me
"Deep in my heart I'm concealing
Things that I'm longing to say
Scared to confess what I'm feeling
Frightened you'll slip away"

Pinilit ko si Madonnang turuan akong mag-tango pagkatapos naming sabay na manood ng "Evita" sa VCD.

La Salida (4 step-start):
Sidestep right. "May boyfriend ka na?" tanong niya.
Sidestep left. "Wala pa."
Left backward. "Kahit isa, hindi ka pa nagkaroon?"
Right forward. "Hindi ko alam kung kami na, e."
Right backward. "E di meron."
Left forward. "Hindi ko nga alam kung kami na, e."
Caminata (the walk):
Right backward. "Hulaan ko, ha. 'Best friends' lang kayo ni—?"
Left forward. "Jason."
Left backward. "Nag-sex na kayo?"
Right forward. "Bakit kami magse-sex?"
Giros (double ocho).
Right pivot. "Kasi, kayo."
Left pivot. "Lalo lang gugulo kapag nag-sex kami."
Right step to left. "Bakit? Mahal mo na?"
Left step to right. "Parang. Pero—"

La Cunita (Spanish cradle):
Left forward. "Parang ano?"
Right backward. "Bisexual siya, e. May girlfriend siya ngayon."

Tumigil sa pagsasayaw si Madonna. "Pagod na ako." Umupo siya sa gilid ng kama.

"Ako rin," sabi ko. Lumabas ako ng kuwarto at tinawagan ang best friend ko.

Erotica
"Give it up, do as I say
Give it up and let me have my way
I'll give you love, I'll hit you like a truck"

Ang init, sabi ko. Naghubad ako ng t-shirt at tumabi sa kanya sa kama. Magkadikit ang mga balikat at braso namin habang nanonood ng "Snake Eyes". Pareho naming inaabangan ang love scene nina Madonna at Ron Silver. Pero magkakalahating-oras na, wala pa rin. Naramdaman kong nababasa na ng pawis ang manggas niyang nakadantay sa hubad kong braso. Ang init, sabi ko ulit. Hubarin mo na rin kaya yang t-shirt mo? Umupo siya at nagsimulang hubarin ang t-shirt niya. Nakasabit pa sa kanang siko niya ang isang manggas nang halikan ko siya sa leeg. Hindi siya umimik. Ginaygay ng mga labi ko ang landas mula sa leeg niya papunta sa dibdib niyang basa ng pawis. Dinilaan ko ang pawis sa dibdib niya. Gumala ang dila ko sa buong katawan niyang basa na ngayon ng sarili kong laway. Hindi pa rin ako napapagod nang hinawakan niya ako sa batok at siniil ng halik. Hinalikan din niya ako sa leeg; inalis ng kanyang dila ang pawis sa aking leeg, kili-kili, dibdib, tiyan, pusod, singit, tuhod, paa. Sabay naming inangkin ang bawat isa. Nagyakap kami pagkatapos. Natulog lang ako nang makita kong nakapikit na siya. Ang mga mata sa nakauwang na aparador ang huli kong tiningnan bago ko muling sinabayan si Jason.

Dear Jessie
"Pink elephants and lemonade, dear Jessie
Hear the laughter running through the love parade
Candy kisses and a sunny day, dear Jessie
See the roses raining on the love parade"

Linggo ng umaga. Naghahanda ako dahil magsisimba kami ng alas-nuwebe ng lola ko. Hindi nagsisimba ang lolo ko kaya ako ang parating kasama ng lola sa simbahan.

Pagbukas ko ng aparador, nandon si Madonna. Naka-evening gown siya. Mukhang Versace; parang itim na leotard ang pang-itaas, may mababang scallop na neckline, hakab hanggang sa may pahang balakang; pa-bolga ang paldang chiffon. Nakalugay lang ang blonde niyang buhok. Mukha siyang debutante. Debutante na may kulubot na sa gilid ng mga mata at mukhang libing ang pupuntahan sa halip na debut party.

"Bakit ako ang idol mo?" tanong niya. Nakaupo siya sa mga damit kong nakatupi sa loob ng aparador. Hindi ko makita ang mga t-shirt ko dahil nakasabog sa loob ng aparador ang palda ng gown niya.

Si Madonna ang idol ko dahil maganda ang mga kanta niya; nakakaindak. Si Madonna ang idol ko dahil maganda siya at magaling sumayaw. Naaalala ko pa kung paano akong tuksuhing bakla ng mga kalaro ko nung Grade Three ako dahil isinuggest ko na mag-Gaya-Gaya Puto Maya na lang kami. May mga nag-i-impersonate kasi kay Madonna noon sa Eat Bulaga. Inaabangan ko ang Eat Bulaga dahil sa portion na yon. Hangang-hanga ako sa mga baklang kamukha at kasinggaling sumayaw ni Madonna.

Si Madonna ang idol ko dahil hindi naman maganda ang boses niya, pero siya ang pinakasikat na babaeng singer sa buong mundo. Si Madonna ang idol ko dahil hindi siya magandang-maganda pero ang daming nagkakandarapa sa kanya. Si Madonna ang gusto ko dahil ipinagyayabang niya ang kung ano ang meron (minsan pati wala) sa kanya. Buhay siyang katibayan ng perpektong paggapi sa hindi pagiging perpekto ng tao.

Si Madonna ang idol ko dahil kapag naririnig ko ang mga kanta niya, nakakalimutan ko kung nasaan ako, kung sino ako, kung ano ang gusto ko sa buhay, kung sino ang gusto kong makasama habang buhay, dahil nagiging ako yung kanta. Nagiging ako si Madonna.

"Ikaw ang lahat ng bagay na hindi ako," sagot ko.

"Male-late ka na ata," nakangiti siya. Sumisigaw na ang lola ko mula sa baba ng bahay.

"Maaabutan pa namin ang simula ng misa. Huli namang magsimula yung pari, e." Kumuha ako ng polong naka-hanger sa loob ng aparador. Pinanood niya akong matapos sa pagbubutones bago niya hinawakan ang mga kamay ko.

Kumakatok na ang lola ko sa pinto. "Dino! Mahuhuli na tayo sa misa! Pista ng Immaculada Concepcion ngayon!"

Hinila ako ni Madonna. Inilagay niya ang mga kamay niya sa mga balikat ko. Napaluhod ako sa harap niya at sa harap ng aparador. Hinila niya ako lalo palapit sa kanya. Napasubsob ako sa tela ng palda ng gown niyang itim.
Nakarinig ako ng kalansing ng mga susi. "Dino! Lintek ka!"

Maaligasgas ang pakiramdam ng chiffon sa mukha ko. Itinaas ko ang mukha ko at tiningnan si Madonna. Napakaamo ng mukha niya. Ngumiti siya sa akin.

Bumukas ang pinto.

---------------
Si Chuckberry J. Pascual ay Libra. Ipinanganak siya noong 1981, Year of the Rooster. Isinunod ang pangalan niya sa sikat na gitaristang si Chuck Berry, na nagsabing nagagamot ng ihi ang alipunga. Isa siyang estudyante ng Malikhaing Pagsulat; paminsan-minsang nagsusulat, paminsan-minsang nagbabasa, madalas nanonood ng sine, parating nakikinig sa musika. Bestfriend niya si Madonna, ka-close si Bjork, at nangangarap maging kasinggaling ni Jewel sa pagtugtog ng gitara. Boyfriend niya si Anthony Kiedis sa kasalukuyan, matapos makipag-break kay Beck at mag-ilusyon kay Ryan Adams.

For comments and reactions to this article, please visit Tinig.com Forums.