ANG KARAPATANG Pantao ay isang compilation mula sa mga magagaling na mang-aawit na pinagtipon-tipon ni Ed Formoso. Ang layunin ng album na ito ay upang ipahayag ang pagsang-ayon ng mga nagsilahok sa tema-na siyang naging pangalan na rin ng album-ng karapatang pantao.

Ang compilation na ito ay binuo nung 1989. Isa-isang inimbitahan ni Ed Formoso ang mga mang-aawit, tulad ng mga batikang sina Heber Bartolome, Joey Ayala, at Jess Santiago, pati na rin ang mga baguhan noon tulad ng The Hay'p, The Next, at The Wuds.

Ang bawat grupo na tumugtog ay may kani-kaniyang pamamaraan ng paglalahad, maging ito man ay punk, folk, Pinoy Rock, o classical. Ang bawat banda ay hindi nagkulang sa mga mensaheng nais ipahayag.

Ang album na ito, sa kalakihan, ay nagbibigay ng nakalulungkot at nakagagalit na pakiramdam sa nakikinig, at ito'y hindi nakapagtataka sapagkat karamihan sa mga kanta ay may tema tungkol sa paglabag sa karapatang pantao.

Mapapansin na ang mga bersiyon ng mga kantang "Ikaw na May Baril" ni Joey Ayala at "Tatsulok" ng Buklod sa album na ito ay mas malakas tumama kaysa sa mga orihinal na bersiyon.

Ngunit, kahit na ang kalakihan ng album na ito ay nakakalungkot o nakagagalit, hindi rin naman mawawala ang mga awiting nakakatawa tulad ng "Pinggan" ni Pol Galang, ang mga nakagigising na "Attorney Akupado" ni Bosyo (Edmund Fortuno, SLN) at "Paaralan" ni Heber Bartolome, pati na rin ang nagbibigay-lakas-loob na "Bayan Naming Minamahal" ng Patatag.

Ang Karapatang Pantao ay isang makabuluhang album—noon at lalo na ngayon. Ang mga awiting natatampok dito ay sumasalamin sa pangyayari noong 1989, nang ilabas ito—at lalo na sa kasalukuyang panahon.

For comments and reactions to this article, please visit Tinig.com Forums.