PALASAK NA palasak na ang salitang "terorismo" sa ngayon. Kapag nagbasa ka ng diyaryo, nanood ng TV at nakinig ng radyo, imposibleng hindi mo ma-encounter ang salitang ito.

Ngunit ano nga ba ang terorismo? Dito sa Pilipinas, wala pang opisyal na pakahulugan sa terorismo ngunit agad na sumang-ayon sa United States (US) of America ang ating pamahalaan sa pagdedeklara sa New Peoples Army bilang "foreign terrorist organization." Kakaiba ito, sapagkat ang NPA ay kilala bilang isang armadong rebeldeng grupo, na sadyang kaiba sa terorista.

Ano nga ba ang terorismo?

Sa isyung ito ng Tinig.com, bukod sa mga palagiang tampok ay inilalathala natin ang isang pagtatangka ni Soliman Santos, Jr. ng Kaiba News and Features na makapagbigay ng legal na kahulugan sa terminong "terorism."

Ang atake ng mga terorista sa US ay nagbunsod ng malawakang "giyera laban sa terorismo" ng nag-iisang superpower sa daigdig ngayon. Ngunit ang digma ng paghihiganting ito ng US laban sa mga terorista ay bumiktima sa napakarami ring inosenteng sibilyan.

Gamit pa rin kampanyang "giyera laban sa terorismo," gumigiri naman ngayon ang US laban sa Iraq. Hindi tuloy maiwasang magdeklara ang marami na mismong ang US ay siya na ring nagte-terrorize sa mundo. Di nga ba't sabi ni Nelson Mandela, ang US daw ang pinakamalaking banta sa kapayapaang pandaigdig.

Talumpung taon matapos ang terorismo ng estado—na mas kilala bilang Batas Militar—sa Pilipinas, unti-unting nakikita ang tunay na anyo ng "strong republic" ng Pangulong Gloria Macapagal-Arroyo. At nakababahala ang sitwasyong tumatambad sa atin: ang malawak na presensya ng US military at pakikisawsaw nito sa mga usaping panseguridad ng bansa habang nakaamba naman ang isang mapanupil na batas—ang Anti-Terrorism Law. Nakakabagabag ang maaaring kahihitnatnan ng kasalukuyang sitwasyong ito.

Nawa'y lalo nating suriin at pag-aralan ang mga bagay na ito.

Siyanga pala, wini-welcome natin sa Tinig.com ang mga bagong columnists, sina Tonyo Cruz ng Bagong Alyansang Makabayan at TXTpower, at si Jayson Edward B. San Juan, campus journalist mula sa Philippine Collegian at Sandigan ng mga Mag-aaral at Sambayanan.

For comments and reactions to this article, please visit Tinig.com Forums.