PARA SA mga bansang ang aklat ng kasaysayan ay basang-basa ng pulang dugo ng digmaan, malaking kapahingahan ang makahimlay sa masagana, luntian, malaya, at payapang daigdig na kinukupkop ng katarungan. Iskolar ng Bayan, di ba't nakakatukso ang paglahok sa kampanya para sa pag-iral ng kapayapaan sa Asya at sa buong daigdig?

Sa mismong kandungan ng Unibersidad ng Pilipinas, kasalukuyang nagtitipun-tipon ang mga Asyanong nahuhumaling sa kapayapaan at katarungan. Walang kapaguran nilang hinahabol ang katiwasayan. Itinatatag nila ang isang malawak na alyansang magtataguyod ng kapayapaan sa buong rehiyon.
Sa NISMED, may 120 kinatawan ang iba't ibang samahan mula sa 16 na bansa na nag-uusap at nagpaplano para mga sama-samang pagkilos upang ilantad sa buong mundo ang mga totoong kaaway ng kapayapaan. Sila ang mga tagapagtatag ng Asian Peace Alliance.

Sa kanyang mensahe ng pagtanggap sa mga kalahok sa pagtitipong tinawag na "Kalinaw—Asian People Speak up for Peace," na tatagal mula Agosto 29 hanggang Setyembre 1, 2002, ganito ang pahayag ni dating Senador Bobby Tañada:

"Nagsasama-sama tayo sa araw na ito upang maghanap ng mga pamamaraan tungo sa pagkakaunawan sa pagitan nating mga Asyano—upang magsimula sa pagkakaisa at magtatag ng pagtutulungan upang maisulong ang kultura ng kapayapaan sa rehiyon."

Ang salitang "kalinaw" ay salitang Bisaya para sa kapayapaan. Galing ito sa salitang "mingaw" na sa English ay "state of stillness, of serenity."

Mananawagan ng Asian Peace Alliance sa mga pamahalaan sa Asya na kanilang bawiin ang suporta sa umano'y pakikidigma laban sa terorismo, na inilunsad ng Estados Unidos matapos itong atakehin ng terorismo noong Setyembre 11, 2001. Tinanggap at sinuportahan ng mga pamahalaan ng mga bansa sa Asya ang giyera ng paghihiganting ito ng US. Si Pangulong Gloria Macapagal-Arroyo halimbawa, ayon sa ilang kritiko, ay nagsisilbing tagapagsalita sa Asya ni US President George Bush.

Bagamat sila mismo ay nagngingitngit laban sa terorismo, naniniwala ang mga tagapagtatag ng Asian Peace Alliance na ang digma ng US ay nagsisilbing banta sa kaligtasan ng mga Asyano at sa pandaigdigang kapayapaan.

May punto naman sila. Nariyan ang Balikaran na tumatapak sa ating pambansang kasarinlan. At di ba sa dikta ng US ngayo'y kandarapa ang pamahalaang Arroyo sa pagsusulong ng isang batas laban sa terorismo? At kapag sinuri mo ang mga panukalang batas ay makikita mong kahit sinong sumalunga sa pamahalaan at sa US ay maaaring ituring na terorista. Parang isasailalim tayo sa batas militar.

Di nga ba't alang-alang sa giyera laban sa terorismo, inihahanay na ngayon ang mga armadong rebolusyunaryong grupo gaya ng New Peoples Army at Moro Islamic Liberation Front sa mga bandidong kidnaper gaya ng Abu Sayyaf at Pentagon Gang?

Kakampi na ng US, napapabalitang ang Japan ay may balak na pagpapatindi ng militarisasyon sa rehiyon.

Sa Gitnang Silangan, gaya ng mga taga-Afghanistan, pati mga sanggol at batang Palestino ay hindi nakakaligtas sa dahas ng Israel na sinusuportahan ng US alang-alang pa rin sa walang hanggang pakikidigma nito.

Naniniwala rin ang mga tagapagtatag ng Asian Peace Alliance na hindi ang militarisasyon at digmaan ang sagot sa terorismo, na kung pakasusuriin ay nag-ugat sa kahirapang dulot ng neoliberal na ekonomiya—US din naman ang nagsusulong at nagtataguyod at sa iba pang di-makatarungang patakarang dala ng globalisasyon.

Ayon kay Achin Vanaik, isang anti-nuclear activist mula sa India at kilala sa buong mundo, ang mga suliraning kinakaharap ng mga bansang Asyano ngayon ay dulot ng pandaigdigang krisis na hatid ng "US-and-corporate-led domination". Upang malutas ang mga suliraning ito aniya, dapat tayong kumilos, sa kabila ng ating mga pagkakaiba, laban sa mala-demonyong kontrol na ito. Kailangan lamang natin na maunawaan nang lubusan ang konsepto ng hustisya.

Kabilang ang UP Third World Studies Center sa mga nanguna sa gawaing ito. Si Pangulong Franciso Nemenzo, pati na rin ang ilang iginagalang na propesor at alumni gaya nina Roland Simbulan, Walden Bello, Miriam Coronel-Ferrer, Randy David, Malou Mangahas, Carmen Abubakar, Jeannie Nacpil-Manipon, Lidy Nacpil, Cookie Diokno, at iba pa, ay may kanya-kanyang bahagi sa paglulunsad ng Asian Peace Alliance.

Maaaring mabigat at para sa ating mga nakababata ang mga isyung ito. Ngunit isiping ang mga Iskolar ng Bayan na nauna sa atin ay umugit sa kasaysayan ng pakikibaka para sa katarungan, tunay na kasarinlan at kapayapaan.

Sana, kahit papaano'y makisangot tayo sa mumunting paraan na maiaalay natin. Kasama sa mumunting paraang ito ang pag-aaral at pagsusuri sa tunay nating kalagayan at ang pagkilala, pagsuporta, at pagsasabi sa iba tungkol sa paglitaw ng mga kilusang pangkapayapaan gaya ng Asian Peace Alliance.

Pinatunayan ng kasaysayan na ang mga kabataang iskolar ay UP ay kabilang sa mga pangunahing tagapagtanggol ng kapayapaan sa bayang itong pugad ng luha at dalita. Muli't muli natin itong patunayan.

Related links:
Yes, Observe National Independence & Peace. Get involved now before it becomes too late.
Babykiller.com - War is Child abuse and murder. Let your voice be heard to stop the killing.

------------------
Ibinabato ni Tembarom, 23, ang hamon ng kapayapaan hindi lamang sa mga taga-UP, kundi sa lahat ng kabataang Pilipino.

For comments and reactions to this article, please visit Tinig.com Forums.