Kung maging tiyan ng tao
Itong dyip ng aming bayan,
Pasasabugin nito ng husto
Ang matakaw ring bunganga
Hanggang luray nitong mailabas
Ang lahat ng lamang loob.

Wari kasi'y isa itong batubalani
Kung humigop sa daan
Ng laksa-laksang tao't paninda.

Kumpol-kumpol at dikit-dikit na
Ang mga dibdib sa likod
At ang mga mukha sa mukha.
Ang iba nama'y walang imik at kurap.
Ni ayaw lumanghap ng hangin.

Sama-sama ang mga bago't presko
Sa luma at mga masangsang.
Kaya naman pinaiitim na lang ang usok
Sa reklamo
Nitong pagal na ring tambutso.

Kasi, kung ito ngang mga gulong
Ay lumalapirot ng mga lusak at bato,
Saan ba't di sasantuhin itong mga pasan
Na animo'y mga linta kung kumapit.

Sapat naman ang pasahe ng bawat isa
At ang mga nakaupo ay masaya.
Ah, katulad din ng mamang nakasabit
Na sumasayaw sa bawat talbog
Nitong dyip sa aming bayan.

----------------
Si Estelito ay taga-Marupit, Camaligan, Camarines Sur.

For comments and reactions to this article, please visit Tinig.com Forums.