Home
About us
Archive
Links
Feedback
Contribute
Forums
Guestbook

Nagsusulsi nang maiwan
Nang ang lahat ay lumisan
Nagtungo sa kasulukan
Ngunit ika'y natagpuan
Mga Hapong kalupitan

Niyakap ng karahasan
Walang humpay na sinaktan
Pinunit ang sinulsihan
Damit na pinaghirapan
Hanggang sa walang matakpan

Tagpi-tagpi ang looban
Ang dangal ay nabutasan
Sa pagtuhog ng karayom
Ang bawat turok ay lason
na tinatahi ng Hapon

Natapos ang mga latay
Bawat retaso ng buhay
Ay inulit mong tinahi
Tinapakan mo ang hapdi
Tinibay ang mga sulsi

Ngayon iyong binubuo
Bandanang isasabit mo
Upang hustisya'y matamo
Ng lahat ng katulad mong
May punit ang pagkatao

For comments and reactions to this article, please visit Tinig.com Forums.