Paalam,
Maximum Tolerance
Ni Armando Sinaglahi
ILANG LINGGO
na rin ang nakalipas simula nang ating marinig ang makasaysayang
paglalahad ng dakilang Pangulo sa kalagayan ng ating bansa—mas
kilala sa tawag na State of the Nation Address. Ilang oras makalipas
ang kanyang makabuluhang talumpati ay taas-noong inilahad ng Philippine
National Police ang kanilang pagbasura sa maximum tolerance policy.
Ang maximum
tolerance ay ang pagtitimpi ng mga pulis sa nakaugaliang marahas
na pagsasaayos ng mga pagkilos na ginagawa ng mga samahang aktibista.
Kung iba ang pagkakaintindi ng mga butihing alagad ng batas sa patakarang
ito, mangyari sana'y ipaliwanag nila ito sa akin.
Sa maikling
panahong lumipas simula nang unang ipinatupad ang maximum tolerance
ay may makikita ka nang kabutihani nito. Dahil dito ay nabawasan
ang karahasan at kaguluhang nagaganap sa tuwing nagkakaroon ng pagkilos—liban
na lamang marahil sa mga isinasagawang pagkilos ng mga maka-Estrada.
Marami sa mga aktibista ay nakauuwi sa kanilang pamamahay nang walang
nararamdamang pananakit ng katawan at may bahagyang tuwa sa matahimik
na pagraos ng pagkilos; hindi na rin nila kailangang labahan kaagad
at isampay ang mga damit na nabasa ng water cannon noong walang
maximum tolerance. Ito rin ang nagbigay-daan sa mapayapang usapan
sa pagitan ng mga pulis at raliyista.
Ngunit kahit
sa panahon ng maximum tolerance ay may nagaganap pa ring karahasan.
Tila hindi dagliang natatalikuran ng mga alagad ng batas ang nakaugalian;
para silang sinasapian ng kung anong masamang kaluluwa. Nagkakaroon
ng sariling buhay ang kanilang mga katawan. Mukhang hindi kumpleto
ang buhay ng mga walang galang at walang utak na mga alagad ng batas
hanggang walang nababatutang matatanda't binatilyo, o hindi kaya'y
magagandang dilag na kanilang hihipuan o babasain ng water cannon.
Dahil sa mas
maraming ikinabuti ang maximum tolerance policy kaysa ikinasama—at
dahil binibigyang katarungan nito ang Art. 3, Sec.4 ng Konstitusyon
ng 1987, o ang kalayaan ng mga taong magsalita, iparamdam, at magpahayag
nang mapayapa sa Pamahalaan ng kanilang hinaing, ano naman kaya
ang dahilan ni Gloria Macapagal-Arroyo at ng mga kagalang-galang
na mga manginginom—a, e...alagad ng batas pala, upang ibasura
ito?
Una sa lahat,
maaaring hindi alam ng Pangulo o ng mga alagad ng batas ang Art.3,
Sec.4 ng Konstitusyon. Mga tao rin daw naman sila, maaaring magkamali.
Makikita naman natin ang iginagalang kunong Pangulo, na kalaunan
ay naglalabas na ng kung sinu-sinong mga kriminal (ayon sa kanila)
sa harap ng media, habang wala pa naman silang ipinakikitang ebidensiya,
at hindi pa nahahatulan sa harap ng hustisya. Naririyan din naman
ang mga pulis, na tuwing nagsasagawa ng isang raid sa mga nightclub
o sa mga pagbebenta at paggawa ng mga ipinagbabawal na gamot ay
puro yaong mga tauhan at hindi yaong mga namumuno sa mga masasamang
gawain na ito ang nahuhuli nila. Katulad ng sinabi ko, mga tao lang
din sila.
Maaari rin namang
hindi alam ng kasalukuyang hepe ng Philippine National Police kung
ano ang ibig sabihin ng maximum tolerance. Malay natin kung palagi
pala siyang bagsak sa mga pagsusulit niya sa wikang Ingles, kaya
imbes na magkamot siya ng ulo sa kakahanap ng kahulugan ay naisipan
na lang niyang alisin ito. Hindi naman siguro ito dahil sa katangahan
ng isang kasamahan niya na nakalimutang magsuot ng headgear at sanggahin
yaong mga batong tumama sa kanya na tila hindi naman naggaling sa
mga kilalang grupong aktibista—wala naman akong nakitang footage
na namamato sila.
Ngunit ang pinakamaaaring
dahilan ay may kinalaman sa tinatawag na strong republic na pinapangarap
itayo ng dakilang Pangulo, sapagkat ilang oras pa lang ang nakalilipas
noong binanggit nila ang pagbabasura sa maximum tolerance.
Kung ang balak
ng Pangulo ay ang magtatag ng isang malakas na republika sa kaanyuan
ng matigas na bato, bakit naman niya dinurog ng bakal na maso ang
bato?
Ang kasagutan?
Hindi ko alam. Kung noong mayroon pang maximum tolerance ay may
nagaganap nang pananakit ng mga pulis, paano na lang kaya kapag
wala na ito?
For
comments and reactions to this article, please visit Tinig.com
Forums.
|
