MULA SA PATNUGOT
Kumusta na'ng Lagay Natin?

KUMUSTA KAYO?

Sana'y nasa mabuti kayong kalagayan habang binabasa ang Tinig.com v17. Mabuti naman kami. Nag-i-enjoy pa rin sa paghahatid sa inyo ng iba't ibang tinig nating mga kabataan. Uy, nakaka-17 isyu na tayo. Hindi ba kayo natutuwa?

Kumusta naman ang bansa? Sa isyung ito, pakinggan natin kapwa ang bersiyon ng State of the Nation Address (SONA) ng mahal na Pangulo at ng mga kabataang Pilipino.

Sabi ni Pangulong Gloria Macapagal-Arroyo, magbubuo tayo ng isang "malakas na republika". Mabuti na lamang aniya at sa unang taon ng kanyang pamamahala ay nalagpasan na natin ang mga krisis. Detalyado niyang inihanay ang mga aniya'y natupad na pangako mula sa kanyang unang SONA. Tingnan ang kanyang SONA ngayong taon. Mula rito, aniya, ay sama-sama tayong susulong tungo sa pinapangarap na "malakas na republika".

Suportado siya ng kanyang mga kaalyado sa Senado. Ayon kay Senador Loren Legarda nang kapanayamin siya ng mga mamamahayag noong araw ng SONA sa Batasan, maganda at comprehensive raw ang talumpati ng Pangulo. Dapat daw tayong magkaisa sa pagtulong sa kanya. Ganyan din ang paniniwala ng ating first-time contributor na si JM Cerna. Ayon sa kanya, dapat tayong magkaisa sa pag-alalay sa Pangulo tungo sa isang matatag na republika.

Ngunit hindi lahat ay sang-ayon sa mga sinabi ni Macapagal. Sa panig ni Bayan Muna Representative Satur Ocampo, nangangamba siya't tila wala sa mga priority ng Pangulo ang usapang pangkapayapaan.

Ayon naman sa bago nating columnist, si Michelle Licudine ng Sanlakas-Youth, hindi maganda ang tunay na kalagayan ng bansa, lalo na sa sektor ng edukasyon. Lumalala aniya ang commercialization sa mga paaralang pampubliko. Naniniwala siyang tinatabunan lamang ng gubyernong Macapagal ang malungkot na kalagayan ng bansa.

Tulad ni Michelle, naniniwala rin si Dolor Labrador na di nga tayo okay. Kahit anong pagtitipid, ubos pa rin lagi ang kanyang kakarampot na suweldo. Natawa na lang siya nang ipagyabang ng Pangulo na P60/kilo na lang ang galunggong. Ako man ay natawa, pagkat hindi ito ang naririnig ko sa market monitor sa radyo.

Sa pagtitimbang ni Dennis Aguinaldo sa bawat panig ng pagtatalo hinggil sa SONA, makikita natin ang magkabilang mukha ng usapin.

Sa totoo lang, mukhang nasa krisis pa rin tayo. At ayon kay canis lupus fidelis ng Tinig.com Forums, sa ganitong panahon mas kailangan natin ang tiwala sa sarili, lakas ng loob, at nasyonalismo.

Pero ang mga ganyang konsepto ay mukhang malayo sa isipan ng Pangulong Macapagal. Deadma muna sa nasyonalismo. Bow tayo ulit sa mga Kano, alang-alang sa "international war against terrorism". Kung noong una ay may sundalong Kano na nanutok ng baril sa mga Pilipinong mediamen, na ayon kay Alex Remollino sa kanyang kolum ay ipinagtanggol pa ng opisyal na Pinoy, ngayon ay mayroon nang sundalong Kano nga na namaril ng pinaghihinalaang terorista pero pinagtatakpan pa rin umano ng Sandatahang Lakas. Excited na rin ang Pangulo na malagdaan ang Mutual Logistics and Support Agreement (MLSA) lalo na ngayon nasipa na sa Department of Foreign Affairs ang makabayang Pangalawang Pangulong Teofisto Guingona na pinalitan ng maka-US na si Blas Ople.

Balik na ba tayo sa panahong ang ugnayang US-Pilipinas ay gaya ng ikinuwento ni Lualhati Bautista sa kanyang nobelang 'Gapo?

Nakakalungkot.

Idagdag pa ang dalamhati ng bayan sa paglisan ng dalawang dakilang alagad ng sining: sina Larry Alcala at Doreen Fernandez.

Ngunit sa kabila ng lahat ng ito, tuloy pa rin ang buhay, tuloy pa rin ang laban. Nariyan pa rin ang mga kuwento, tula at iba pang handog ng Tinig.com sa inyo. Siyanga pala, magbabalik sa susunod na isyu ang column ni Mong Palatino. Sana, magpadala pa rin kayo ng inyong mga kontribusyon.

Hanggang sa muli.

For comments and reactions to this article, please visit Tinig.com Forums.