Tungo sa Isang Matatag na Republika
Ni JM Cerna

NOONG NAKARAANG State of the Nation Address ni Pangulong Gloria Macapagal-Arroyo, ang tema nito ay ang pagbuo ng isang matatag na republika. Marami ang sumang-ayon sa tinuran ng pangulo ngunit marami rin ang hindi naniniwalang mangyayari iyon, gaya lang iyon ng mga dati nyang ipinangako sa kanyang nakaraang SONA.

Ngunit ano ba talaga ang ibig nyang mangyari sa ating bansa? Totoo ngang kaliwa’t kanan ang problema ng ating bansa. Andyan ang mga Abu Sayyaf, Tiwaling opisyales ng gubyerno, ang walang katapusang rally, ang PPA, ang ating ekonomiya at marami pang iba.

Ngunit ang pagbuo ng isang Matatag na Republika ay di malayong mangyari dahil ito ay magaganap kung lahat tayo ay makikipagtulungan sa pamahalaan. Ang hirap kasi sa atin puro kamalian ng gubyerno ang ating nakikita.

Imbes na ang positibong pananaw ang ating dalhin ay puro na lang negatibo ang ating tinitingnan. Nakakalungkot dahil kulang na kulang ang suporta ng mga tao sa ating pamahalaan. Kahit noong mga nakaraang administrasyon pa naman di ba? Nagsimula kay Ferdinand Marcos, Corazon Aquino, Fidel Ramos, Joseph Estrada at ngayon sa administrasyon ni Pangulong Macapagal. Imbes na tulungan ay sinisira pa.

Kung tutuusin tayo rin ay maituturing na isang anay ng gobyerno kung lagi na lang ganito. Kung tayo lamang ay makikiisa at gagawa ng mga kapaki-pakinabang na mga bagay sa ating lipunan ay tiyak na makakatulong pa tayo. Maaari naman nating punahin ang gobyerno ngunit dapat ay sa maayos na paraan.

Naalala ko noong nag-usap kami ng aking kamag-aral, pinag-usapan namin ang tungkol sa mga nagwewelga sa aming unibersidad. Nasabi ko nalang na maaari naman kasing pag-usapan yan nang maayos, kesa naman sa mag-welga ka, ang dami pang nadadamay. Gaya na lang ng isa sa aming kamag-aral na walang kamalay-malay pero nabato sa ulo ng nagpo-protestang estudyante. Masakit isiping kailangan mangyari ang ganoon.

Bakit kaya di natin subukang makipag-usap nang mapayapa sa Pangulo o sa kanyang opisyales? Sa aking pananaw kasi, ang pagsasagawa ng welga o rally ay isang pagsasayang ng oras at tunay na nakakapagod.

Ang SONA ng Pangulong Arroyo ay punong-puno ng pag-asa. Wag lang tayong umasa sa mga gagawin sa atin ng gubyerno bagkus tayo rin sana ay kumilos upang mapaunlad ang bansang ito. Ang lahat ng sinabi ng Pangulo sa kanyang SONA mga gabay lamang sa ating bansa. Magkaisa tayo sa minimithi ng ating pamahalaan dahil tayo ay isa sa mga kasangkapan upang mabuo ang isang Matatag na Republika.

---------------
Si JM, 22, ay isang communication arts student sa University of the East. Mahilig siyang kumanta at makinig ng radyo at nais niyang maging broadcaster at singer balang araw.

For comments and reactions to this article, please visit Tinig.com Forums.