| MAIKLING
KWENTO
Cable TV
Ni Carlos Piocos III
NAKAKAINIS!
HINDI na naman ako nakatulog kagabi, kasi nanaginip ako! Ang kaso,
hindi ko na matandaan iyong panaginip ko. Hindi naman ako binangungot.
Kasi kung binangungot ako, malamang hindi lang ako nanaginip, nadedo
na ako. Pero, since hindi ako binangungot, nanaginip lang ako. Kasi
nga hindi ako makatulog. Actually, nakatulog na ako, paano naman
ako mananaginip kung hindi ako nakatulog di ba? Pero, hindi na ako
makatulog ulit, pagkatapos kong managinip. Iyong panaginip ko naman,
hindi naman siya gaanong nakakatakot. Hindi ko nga natatandaan iyong
napanaginipan ko, di ba? Basta parang nainis lang ako sa panaginip
ko. Pero hindi ko alam iyong napanaginipan ko.
Iyon nga nainis
ako. Kaya alas-tres nang madaling araw ay nagising ako. Bumaba ako.
Nagulat sa akin iyong kaibigan kong multo. Bakit ako nagising, e
dalawang oras pa lang ako nakatulog? Pati tuloy siya nagising rin.
Pero di niya ako minulto, kasi nga nauna akong nagising sa kanya
hindi ba? Paano pa ako matatakot sa kanya e nadatnan ko siyang natutulog?
Kung nakatayo siguro siya, tapos naka-amba iyong dalawang kamay
niya sa akin, tapos, galit iyong hitsura niya tapos labas pati pangil
niya, di dapat matatakot ako sa kanya! Kaya lang nanaginip ako,
tapos nainis nga ako sa pinaginipan ko, hindi ko na nga matandaan,
basta nanaginip lang ako. Tapos bumangon na nga ako dahil, di ba
nga nainis ako sa pinaginipan ko, tapos iyon nadatnan ko na siya,
tulog, e gising, e nagising ko pala siya. Hindi nga siya nakakatakot
di ba. Dahil una, kaibigan ko siya. Tinatakot niya ako, pero alam
mo na hindi naman niya ako talaga kinakain. E, paano niya ako kakainin,
e wala naman siyang ngipin. Pangil meron, pero ngipin wala. Bakit
may pangil siya, tapos wala siyang ngipin? E, hindi naman niya kailangan
ng ngipin para manakot di ba, pangil lang! Kaya nga lang dahil sa
kaibigan ko siya at nadatnan ko siyang natutulog, paano pa ako matatakot
sa kanya? Tapos, tulo pa iyong laway niya habang bukas iyong bibig
niya tapos mukha pa siya palaka. Paano ka naman matatakot doon?
Well, yun na
nga! Wala lang akong magawa. Hindi ko naman kasi gawain ang manggising
ng multo tuwing hindi ako makatulog e, kaya hindi ko alam ang gagawin
ko! Kaya yun nanood na lang ako ng tv. Tumingin ako ng palabas sa
TV. Grabe pare, ang ganda ng palabas sa Channel 2 at 7. Meron silang
art special, yun isang oras na broadcasted art exhibit ng mga painting
na impressionists. Grabe pare ang ganda, biruin mo iyong mga impressionist
painting walang kulay. Black, white at gray lang. Oo, impressionism
iyon. Astig pare! Postmodern cum impressionism, mayroon bang ganun?
Iyon nga pagmamasadan mo lang iyong mga dotted lines, tapos iyong
orientation ng mga black and white areas, tapos yun makikita mo
iyong sarili mo. Galing pare. Sino kaya yung nag-paint nito, kanino
kayang konsepto ito, grabe galing kasi e. Sandali saan ba iyong
pirma ng painter, sandali…wala talaga e. Teka lang, ha, dapat
nag-sign out na ang ABS-CBN ngayon ha.
Inilipat ko
muna sa HBO. Marami kasing magagandang pelikula sa HBO tuwing gabi.
Actually, hindi naman talaga magaganda. Wala lang! Iyong mga pelikulang
hindi mo kilala iyong mga artista, iyong direktor, kahit iyong producing
outfit. Tapos walang gaanong istorya, parang pinagpuyatan lang.
Wala lang! Iyon nga, hindi ba dito nagsisimula iyong mga nangangarap
mag-Hollywood sa mga ganitong pelikula! If I know, bago pa sumikat
si Leonardo DiCaprio, binilad muna niya iyong titi niya sa Total
Eclipse of the Heart, bago siya nag-Titanic, yung pelikula, hindi
yung titi. Tapos, hindi ko lang alam, pero si Kate Winslett yata,
ilang beses na pinakita iyong suso niya bago siya nag-Titanic, yung
pelikula ha, hindi yung suso. Okay lang naman iyon sa kanila, di
ba. Kasi once na humarap ka sa kamera at gumawa ng sining (quote,
unquote), nagiging komoditi ka na. Wala ka nang pinagkaiba sa Coke
o Master Sardines. Essentially, ganun na rin iyon di ba? Hindi ba?
Yun nga, nanood
nga ako ng mga mukhang minadaling pelikula. Iyon nga kasi nabasa
ko, iyong direktor, iyong editor, scriptwiriter, producer, stuntman,
iisa, pati pala kameraman, parang ayun, hawak niya yung kamera,
tapos siya rin yung kinukuhanan ng kamera. Ang saya di ba? Kung
ipa-package siyang komoditi, siya yung all-in-one, new and improved
super revitalized with RH34 Tide powder (walang chalk)! Iyon nga,
natapos na iyong pelikula. Sumunod iyong isa. Wala lang, nagse-sex
yung dalawa. Walang mukha e, sandali lang ha, teka, wala ring mga
titi, e! Paano sila nagse-sex e wala silang mga titi? Malay, basta
parang nararamdaman ko lang nagse-sex sila! Iyon natapos iyong pagse-sex
nila. Tapos, tapos na! Tiningnan ko iyong film credits, tapos blank
screen lang yung lumabas. Grabe pare, sandali, may lumalabas, sexmate
no.1 as sexmate no.1, sexmate no.2 as sex mate no.2, directed by
the director, screenplay by the scriptwriter, produced by the producer.
Kilala ko ba sila?
Tapos, nagpatalastas.
Hindi ko nga alam, e, pero may patalastas na pala ang mga cable
channels ngayon. Una, yung fastfood chain. Grabe, sarap na sarap
iyong buong pamilya sa burgers, fries and chicken. Grabe, sarap
na sarap sila, tumutulo pa iyong mantika, punung-puno ng ketchup
iyong manok, grabe, sarap na sarap sila, tapos, plastik lang pala
iyong kinakain nila. Pero, promise, sarap na sarap pa rin sila!
Tapos sumunod iyong mga damit, na nirarampa ng mga naglalakad na
mga skeleton. Oo, mga skeleton na naglalakad,este, rumarampa pala.
Iyong isa nakasuot ng jacket, pero see-through yung pelvic bones
at yung ribs niya. Yung isa walang ibang suot, naka-medyas lang
, tapos may malaking headband sa bungo niya. Galing, pare! Tapos
may flash news pa. Iyong nagbabalita, ang lakas ng boses. Sigaw
nang sigaw. Grabe ang ingay, sigaw ng sigaw! BIN LADEN, PUMUNTA
SA MASQUERADE PARTY BILANG US PRESIDENT! BAGONG SOFTWARE PROGRAM
WITH BUILT-IN POISON GAS, BUMENTA! MANNEQUIN, BEST ACTRESS SA OSCARS!
COUNTERSTRIKE, TOTOONG TERORISTA SA VIDEOSTATIONS ANG GINAMIT! BURATNEY
SPHINX, NI-LAUNCH ANG INHALE, EXHALE ALBUM!
Tapos sumunod
naman, drama. Grabe pare, ang galing umarte ng lead. yung babae,
as in sobrang umiiyak. Una tumulo iyong luha niya, gumuhit iyon
sa pisngi niya tapos nagkakorte na. Iyong una, mga simple lang,
heart, sun, apple, banana, star, tapos grabe as in over, ang galing,
naghugis Nike, Adidas at Converse logo iyong luha niya sa pisngi.
Tapos hindi lang iyon, pare, naghugis Mickey Mouse ang Minnie Mouse
din, tapos nagsasayaw yung dalawang daga. Grabe ang galing talagang
lumuha ng lead. Tapos susunod, hindi lang luha iyong nilalabas niya.
Parang mga nagsulputang mga tagyawat iyong mga pawis niya. Grabe,
bilog na bilog na bilog, parang earth. Pero hindi nga pala bilog
ang earth, parang trixial spheroid pala iyong mga parang tagyawat
kung magsulputang mga pawis niya. Tapos tumulo rin yung pawis niya.
Tapos tumulo rin yung sipon niya. Tapos tumulo rin yung luga niya.
Tapos tumulo rin yung laway niya. Hanggang lumuha na siya ng dugo!Pare
ang galing, talo pa si Nora Aunor (Walang Himala!) kung umiyak ng
dugo, pare. Talo pa si Mama Mary (Santa Marya, Ina ng Diyos…)
kung umiyak ng dugo, pare. Ang galing-galing niya talaga, promise.
Tapos nagpatalastas
na naman. Oo, mga up-and-coming movies naman 'to. yung isa, adventure.
Ang title - Planet of the Temptation Island of the Survivors CMXII.
Oo, pare, ang galing oh! Ipinagbenta na iyong earth sa mga aliens.
Grabe, sinakop tayo ng mga aliens. yung unang pumunta lang rito
yung mga aliens para tulungan tayo with their gadgets and that sorts
of stuff. Tapos tinuruan tayong magsalita sa alien language. Grabe,
parang ganito yung sabi ng bida, oh - me-di-du-po-gi-gi-ha-ha-bu-la-tim-buk-tu!
Tapos nagmukha na rin siyang alien. Tapos, pinakain din tayo ng
alien rice, alien water, alien fried chicken, alien ang lahat. Oo,
naging alien ang lahat. Kaya nga Planet of the Temptation Island
of the Survivors CMXII, di ba! Kailan kaya ang showing nito (- Now
on Your Nearest Theaters and Drugstores!)?
Pagkatapos niyon,
war film naman ang sumunod. Grabe Kadiri to death… patayan,
barilan, sampalan (oo, pare, nagsasampalan sila ng riple), sabunutan
at pakikipag-sex. (grabe, pare, hanggang dito may nagse-sex pa rin.
Iyong heneral nakikipag-sex sa isang sundalo sa gitna ng warfield,
pare. Astig!). Malalakas iyong mga baril at explosions. Ang ganda
ng setting. Sabog-sabog-sabog! Durog-durog-durog! Yung mga bahay
sabog! Yung mga artista (quote,unquote) durog! Tapos may pool pa
ng dugo. As in, pulang-pulang dugo. Andaming dugo, parang niregla
ang lupa! Tapos nagsi-swimming pa iyong mga sundalo. Iyong iba naka-trunks,
(camouflage ang design!) parang male cover version ng Sports Illustrated
Swimsuit Special. Grabe, ang galing din ng acting nila kasi walang
namamatay. Iyong isa, hawak iyong putol na paa, iyon yung pinambabaril
niya. Iyong isa, naman pinambala ng kanyon iyong pugot na ulo niya.
Pinakaastig iyong bida, naglalakad sa ere iyong bida. Grabe, nasa
kanang balikat niya iyong red-lion-super-over-mega-dynamic blaster,
nasa kaliwang balikat niya iyong crouching-tiger-hidden-dragon na
samurai-x(rated)-sword pero hindi niya ginagamit. Naglalakad lang
siya sa ere tapos nangangarate. Grabe, ang galing, talo pa si Jesus,
hindi lang naglalakad sa tubig, nag-cha-cha pa sa hangin. Tapos
nangangarate siya kasi nga black belter iyong bida sa pelikula.
Paano ko nalaman? E may itim na belt sa balakang nu'ng bida! Iyong
nga, kinarate-kid niya iyong mga kalaban, pati iyong mga kasama
niya. Walang namatay, kasi nga wala naman talagang namamatay. Humihiga
lang iyong natatalo ng bida, tapos pipikit tapos mayamaya makikipag-sex
na rin sa heneral. Grabe nga e, ang dami ng nakikipag-sex sa heneral,
hanggang ang lahat ay nakikipag-sex na sa heneral. Pati iyong bida,
nakikipag-sex na rin sa heneral. Orgy, pare, orgy! Ayun pala ang
titulo ng pelikula, Make Love Not War. Astig pare, war film pala
siya!
Tapos, tapos
na yata ang pelikula. Hindi may susunod pa. Teka napalabas na 'to
kanina pa e… paulit.. ulit.. ulit… ulit… ulit…
Pinapatay ko
ng remote control iyong tv, pero hindi siya mapatay. Naiinis na
ako! Paulit (…ulit.. ulit… ulit… ulit…) na lang
iyong mga pelikula. Naiinis na ako! Dinampot ko iyong tsinelas ko,
tapos binato ko sa screen.
Sumabog(BOG!)
iyong TV…
Nanahimik ang
buong kabahayan.
Bumangon na
ako.
Nag-unat.
Nagkuskos ng
mata.
Saka naghilamos.
------------
Si Carlos ay kasapi ng UP Ugat.
For
comments and reactions to this article, please visit Tinig.com
Forums.
|
