Sina
Martin, Edibora, at mga Sundalo ni Samuel
| Alipato |
 |
| Alexander
Martin Remollino |
MATAPOS ANG
"matagumpay" na pagkakasagip kay Gracia Burnham mula sa
mga kamay ng bandidong Abu Sayyaf, na nakasabay ng pagkakapatay
sa mga kapwa niya bihag na sina Martin Burnham (asawa niya) at Ediborah
Yap, maugong ang mga balitang tuluyan nang makikialam ang mga sundalong
Amerikanong nasa Mindanao sa pagtugis sa naturang bandidong pangkat.
Dati'y sa pag-eespiya lamang "tumutulong" ang mga sundalong
Amerikano sa ating militar.
Matatandaang
kaya nagpadala ng mga tropa sa ating bansa ang napakagiting na Pangulo
ng Estados Unidos na si George W. Bush ay upang diumano'y turuan
ang ating militar sa pagtugis sa mga terorista, kung saan kasama
raw ang Abu Sayyaf, na ayon mismo sa isang mataas na opisyal ng
Amerikanong militar ay matagal nang itinakwila ng mismong teroristang
si Osama bin Laden dahil sa pagiging lubhang mersenaryo ng mga ito.
Nang dumating
ang mga tropang Amerikano sa ating bansa ay halos nagapi na ng ating
mga sundalo si ang Abu Sayyaf-napalibutan na si Abu Sabaya-at kaya
lamang nakatakas ang mga bandido ay sapagkat ang mga sundalong kalahok
sa pagtugis ay biglang ipinatawag ng kung sinong magagaling na heneral
upang dumalo sa isang briefing.
At ang mga sundalo
ni Tiyo Samuel ay nagsitungo nga sa ating lupain. Mahigit sa tatlong
buwan nilang sinasanay ang ating mga sundalo sa paggamit ng mga
sopistikadong sandata, na aywan kung ano ang magiging silbi sapagkat
iuuwi rin naman nila pagkatapos ng ehersisyong militar. Mahigit
sa tatlong buwan din nilang "tinutulungan" ang ating mga
sundalo sa pagmamanman sa Abu Sayyaf, at kaya nga raw natunton ang
mga bandido nang araw na masagip si Gracia Burnham at mapatay sina
Martin Burnham at Ediborah Yap ay dahil sa "tulong" nila.
Ngayo'y halos
lumuhod ang mga tagahimod ng sapatos ni Samuel sa mga pamangkin
niyang sundalo. Ang gagaling daw nila, at dahil dito'y wala raw
masama kung ang ehersisyong militar sa pagitan nila at ng ating
militar ay mapalawig nang higit pa sa itinakda ng mga aregluhang
sumasaklaw dito.
Datapwat ang
nangyaring pagwawakas sa naturang krisis ng pambibihag ay nag-iwan
ng higit na maraming tanong kaysa sagot.
Kung talagang
magagaling ang mga tropang Amerikanong "tumulong" sa ating
militar na manmanan ang Abu Sayyaf, bakit nang araw na magkasagupa
ang mga puwersa ng pamahalaan at ang naturang bandidong pangkat
ay hindi namataang kasama nila ang mga bihag. Nakaunipormeng pansundalo
raw kasi ang mga ito nang mamataan ang Abu Sayyaf, anang Roilo Golez,
Tagapayo ng Pangulo sa Pambansang Seguridad.
Subalit hindi
ba't sa karanasa'y nakikitang ang kaparaanan ng Abu Sayyaf ay umiwas
sa mga sagupaan sa pamamagitan ng paggamit sa kanilang mga bihag
bilang mga panangga sa punlo? Bakit ngayon nila papagsusuutin ng
unipormeng pansundalo ang mga ito, samantalang sa gayo'y higit silang
magiging lapitin ng punlo?
Makabubuti ring
matandaang sa naging digmaan ng Estados Unidos at Afghanistan kamakailan,
hindi ang Taliban na siyang kalaban noon ng mga puwersa ni Tiyo
Samuel ang lumitaw na pinakamalaking talunan. Tatlong libo't limang
daang sibilyan ang naiwang mga bangkay matapos ang naturang labanan.
Ilang ospital at palengke ang tinamaan ng mga bombang inihulog ng
mga eroplanong Amerikano. Sa maraming nabihag ng mga sundalong Amerikano,
kabilang ang ilang masigasig na pinunong anti-Taliban.
Ang kasaysayan
ng mga sundalong Amerikano sa Afghanistan at sa Mindanao ay nagpapakitang
maliwanag pa sa sikat ng sanlibo mang bituing sinliwanag ng ating
araw kung gaano kagagaling ang mga sundalo ni Samuel, na hindi malayong
isang araw ay makita nating nagsasagawa ng operasyong militar sa
ibabaw ng sariling lupa natin.
Oo nga't kailangan
nating masugpo ang Abu Sayyaf, subalit huwag sa paraang hindi lang
magpapawalang-saysay sa soberanyang magpahanggang ngayo'y ipinagbububo
ng dugo ng mga tunay na Pilipino kundi maglalagay din sa ating lahat
sa walang katumbas na panganib. Ang nagpapalala sa krisis na nililikha
ng Abu Sayyaf, ayon sa karanasan, ay ang pakikipagsabwatan ng matataas
na opisyal ng militar sa kanila. Nasa atin, samakatwid, ang kalutasan-ang
pagsasagawa ng sibil na pagsuway hanggang sa mapilitan ang pamahalaan
na gawin nang maayos ang pagwawakas sa krisis na iyan.
For
comments and reactions to this article, please visit Tinig.com
Forums.
|
